金手指：蔡東豪的新水魚
■蔡東豪最厲害嘅係當時「主場」被一嘢清倉嘅寫手，冇一個出嚟嘈。 資料圖片
短短七日特區新聞多得很，今日唔可以唔講蔡東豪。有如blogger順叔話，蔡東豪以前形象潔癖，偶像係昂山素姬、曼德拉，迷倒一眾填鴨左膠，Tony Chok之名當之無愧。但基本上「我恐懼」三隻字已令佢誠信破產。故一定要服佢，居然又可以搵咁多人再落疊。真係唔知道佢師傅係邊個，班股民已供股供到瞓低後，又搵到另一班例如何韻詩嘅水魚。服！
我得一個建議畀呢批新水魚，寫嘢記得記得backup。所以Tony Chok最厲害嘅係當時被一嘢「清倉」嘅寫手，冇一個人出來嘈，同樣可以叫佢做Tony Chalk，當其他人啲文係粉筆字。主場啲左膠，連EQ都高啲。當劉慧卿都有黃洋達，唔同蔡東豪好似癌細胞咁冇天敵？唯一能滅絕嘅方法係用標靶藥cut血液供應？金融中心多奇人呀！
呢個聖誕孫柏文特別安慰，我國真強，超英趕美。就喺平安夜居然能落實伯南克嘅夢遺，通街射鈔。只係因我哋摩天大廈多，故唔用得直升機。相信日本、花旗國啲特務，已快速打報告，講我國中央如何落實終極量寬。唔怪得中行（3988）呢排咁勁，因被肯定為政策銀行！
問心，嗰單嘢最令人唔開心嘅，就係連執錢都係大陸自由行旅客執得最多最狠，而跟住一單又一單嘅「路不拾遺」拉人，冇個係大陸人。直情係地鐵車廂港人飲水被罰，大陸人屙屎收告票後，拍拍屁股離境嗰隻。
繼續一注獨沽日圓
最後講到量寬，不能不提多次一注獨贏沽日圓。早前日本數據話國民儲蓄率係負數，因老人家食老本人數超上班族儲蓄。日政府財赤要借錢，印出嘅國債借據已冇買家，稅收四成已用來淨係還息。得番日央行印鈔買國債，日圓要跌只係幾快同幾深。美元強勢令由石油、日圓、企業債、貴金屬全跌，唯獨股票升，呢啲市我唔識炒亦唔敢掂。但你要買我亦明白，始終蔡東豪再搞網站都再有人一齊玩。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
