有貨莫急沽
2014/12/30 09:02:31
網誌分類: 經濟
歐洲因希臘而動蕩，希臘國會反對由首相提出的總統人選，意味要重新大選，並可能讓反對歐盟及援助方案的敵對政黨上台，希臘股市最多跌11%， 而希臘10年期國債利息亦最高升穿9厘，歐元亦跌至28個月低位。不過消息對其他國家的影響不大，德國股市微升0.05%。美股杜指就微跌15點，收18033點，跌幅不足0.1%。
外圍無大波動，相對而言A股和港股就精彩好多。昨日好多人講的話題是H股追不上A股，港股又追不上H股。由聖誕至昨日三日之內，內銀A股升7%，但H股昨日只升3%；內地證券A股升10%，H股彈不足3%。最明顯的是恒生AH溢價指數在不足兩個月內升升逾20%，升至124.4，等如A股較H股有24.4%溢價。
表面上是內地瘋狂，香港冷靜，但以本地計，則是散戶沽貨多，基金多按兵不動，甚至少量增持。我有幾個觀察:第一，內地雖狂，未偏離基本因素。內地股市明顯轉入一個以資金為主導的牛市，它狂在短期升得急升得快，不願回吐。但內地官方政策有明顯變化，變成一個對股市有利的放水市，好似調整內銀非同業存款計入帳中又不用有存款準備金，已可釋放1.6至1.8萬億貸款，估計第一波放出來的錢是流入股市而非實體經濟，所以股市有炒作的活水。加上內地上證綜指雖然由2400點升到近3200點，但估值相對於外圍股市仍然不高，不算有好大泡沫。
第二，本地散戶沽貨太急睇得太淡。雖然話H股係一個國際化市場，A股是內地封閉市場，所以H股股價較合理。但細心去看，如今沽H股的多數是散戶，不是基金，主要因為散戶聽埋聽埋唔少內地股票的負面消息，例如內銀好快爆煲，內地樓市將會崩潰之類，對內地股票形成極負面的看法，所以講乜地都唔信，加上蟹得太耐，一到價就沽，好似國壽(2628)
見30元，好多揸咗多年的蟹貨，一到家鄉即走，但散戶沽誰接貨? 主要還是機構投資者。但這些關於中國會爆煲的負面消息，主要是外資證券行的分析，而外資行好多時睇住資金流，而講出基本面的故事，睇住美股好炒，資金從香港流走回流美國，就用中國爆煲來解釋，中國近期變了，外資行老細放曬假未及反應。 第三，時近年尾唔敢太勇。我同基金經理傾，除了好多人放咗聖誕假之外，近年尾埋數，好多人揸唔夠膽大力去追紅色股，都只是酌量增持少少，唔想大追貨，怕一追就回，影響年結表現，所以不排除過完年後，機構投資者對H股變得更積極一些。
若然係大陸強香港弱，而香港又係散戶買多，咁前景就唔好太睇好，因為機構出貨有理由，但如今係散戶沽為主，就可以睇番好少少，有貨都唔好太急沽啦。
陸羽仁
回應(8) 我想回應
陸羽仁 BLOG 舊文
