魚樂無窮：中國信貸三財星拱照
■月初總理李克強到深圳視察前海微眾銀行，見證互聯網銀行首筆貸款。 資料圖片
如果滙豐等同外國勢力，港股肯定大禍臨頭。點解？滙控（005）係恒指成份股最重磅嘅一隻，佔比超過一成，要剷除異己，恒指起碼唔見一截。
長和系重組，一石激起千重浪，華資藍籌有鑊氣，噚日推介嘅會德豐（020）再炒高3.7%，證券商摩通亦buy重組概念，仲圖文並茂教吳光正點樣做，目標價睇48蚊，上升空間依然遼闊，有貨可續揸。另外，新地（016）同樣炒重組概念，今年推介第一擊載通（062），又多一個概念，目標價廿蚊不變。
月初總理李克強到深圳視察前海微眾銀行，親自見證互聯網銀行首筆貸款，中央對互聯網金融嘅重視程度，不言而喻。近年全方位強攻互聯網金融嘅嘅中國信貸（8207），主要提供P2P貸款及第三方支付服務，肯定食正條水。根據《中國互聯網金融報告》，去年上半年P2P平台交易額接近1,000億元人仔，相當於2013年全年成交量，爆炸性十足。公司日前宣佈，收購網信理財10%股權，後者屬內地P2P融資平台龍頭，去年累計交易量逾82億元人仔，按年爆升186倍，策略股東更包括建銀國際，後台夠猛，兩者強強聯盟，中國信貸可謂如虎添翼，轉主板只係時間問題。而家市值60億元唔夠，可塑性大到不得了，有紥實基礎、有亮麗前景、有阿爺支持，炒上100億元市值一啲都唔過份。
唐牛
https://www.facebook.com/tongcow88
唐牛
魚樂無窮 - 唐牛 舊文
