中環在線：亞洲首富之位越來越遠
馬雲買王老吉下火
■馬雲成日周圍買嘢，今次啜下涼茶王老吉先。 設計圖片
阿里巴巴創辦人馬雲真算奇人，一時話搞電影，一時又話發展足球隊、入股奶業公司等等，總之就係估佢唔到，新近佢就投資涼茶品牌王老吉。可能因為佢追唔過超人李嘉誠做亞洲首富，所以燥底要飲涼茶下火喇。
事緣擁有王老吉呢個涼茶品牌嘅白雲山（874）A股公司早前配股，有知情人士爆料，指馬雲有份嘅雲峰基金拎咗5億人仔認購股份。
內心有團火 言論出位
唔好睇馬雲平時又耍太極、又飲普洱好似好禪咁，其實佢內心嗰股熱血真係熱到你唔信，只要講到某啲話題，佢真係可以好放、有時甚至過曬火。
遠嘅唔講，上星期內地出版嘅《阿里巴巴正傳》就爆出，馬雲曾不留情面咁批評對手京東，揚言「京東將來會成為悲劇」，雖然馬雲隨即喺「來往」補鑊，話任何商業模式都唔完美，適合自己理想同受客戶歡迎就係好方法。
馬雲講嘢咁鬼容易惹火，佢投資嘅瓣數又越來越多，日理萬機，唔夠瞓，導致燥底都好正常，飲多啲涼茶都係好事。而且，之前孖屐成日吹捧佢，指阿里巴巴嘅市值越來越大，馬雲可以再度超越超人做亞洲首富（舊年12月做過一陣），點知超人最近公佈世紀重組後，長實（001）、和黃（013）股價大漲令佢身家上升，喺富豪榜又拋離馬雲，馬雲唔服氣確係要飲涼茶降火。
講番馬雲入股白雲山A股，知情人士又話，好快會同馬雲旗下阿里健康（241）簽署戰略合作協議喎，詳細內容就未見。白雲山旗下公司有咁多產品，放喺阿里健康嘅平台賣，都唔係冇可能㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
