一周三件：世紀陽光超抵
■池文富任主席的世紀陽光，主打金屬鎂未來市場需求大，業務前景看俏。 資料圖片
世紀陽光（509）揸住熱爆金屬鎂嘅瓣數，得超低單位數PE及一倍樓下PB，已經便宜過行家一大截。若果呢壇製作有機會分拆出嚟嘅話，身價反映，增值更加不得了，而集團股價，仲潛喺一年低，有冇搞錯？
主打鎂市場需求大
世紀陽光主打金屬鎂同肥料。前邊講緊嘅鎂，由下至手機嘅外殼，上至航空航天科技都用得著，而集團鎂合金基地，亦獲得國土資源部同埋財政部頒授「示範基地」嘅榮譽，攞到國家政策補助1.4億元人仔。睇產品同本身技術，就知幾巴閉。
世紀陽光上年上半年盈利增長咗46%，到1.27億元，就當全年盈利起個孖到2.54億元，上年盈利都已經增長10%，預測PE得7.5倍。
再講，鎂同樣被喻為21世紀「綠色」輕質結構材料，報載北美汽車協會預測，到二零二零年，如果要達到聯合國製訂嘅減排標準，汽車喺鎂合金嘅需求，將會呈現十倍爆炸式增長。
又世紀陽光嘅合作方忠旺（1333），今年會引進德國汽車輪轂生產線，若果成功嘅話，單係忠旺，所講鎂合金年需求，已經係七萬噸！世紀陽光啱啱喺過去嘅上半年，總計鎂產品銷量，都係講緊得九千五百噸左右。嚟緊幾年，若果順風順水，真係肥過肥仔水。
又世紀陽光呢期股價插到落一年低，現價（0.68元）PB得0.8倍，祖國行家雲海金屬預測七十倍PE、3.5倍PB，宜安科技六十五倍PE、六倍PB，世紀陽光已平咗一大大截。又世紀陽光仲可以透過分拆注資，反映鎂呢瓣業務嘅肥仔身價，價值一浮面，PB仲吸引。
買世紀陽光，當係咁意翻半番到1.04元計，PE先講緊得十一倍，PB得1.2倍，實情未有耐追到行家。
錢雋
細價股專家
本欄逢周二、三、五刊出
錢雋
一周三件 - 錢雋 舊文
