異動空間：民企冷箭不勝防
炒民企真係膽戰心驚，樓盤賣賣下可以叫停，老闆可以突然失聯失蹤，過幾日搵番佢，原來係「嚴重違紀」受查，債價大跌兼違約，資金鏈斷裂，大批債主臨門追數，股價暴跌六、七成，最後停牌清盤，成個過程可能只需一、兩個月。以上故事純屬虛構，如有雷同實屬不幸，但只要係大陸民企，老闆得罪權貴，或者政治不正確企錯邊，當以前靠山被清算，自己也就大禍臨頭。
民企內房股最易中箭，皆因收地、投地，涉及巨額金錢利益，官商關係必然「非常密切」（你懂的）。佳兆業（1638）事件餘波未了，花樣年（1777）、恒盛（845）、華南城（1668）昨全線急插，揸住呢啲股票，贏又好輸又好，最好先沽貨甩身，真係冇事再報仇未遲。
強國版MPF推出，相當狼死，員工供月薪8%，僱主更要供兩成，繼續由阿爺睇檔，櫃桶底肯定穿大窿！分析指呢筆錢日後將交由保險商打骰，跟足香港強迫金制度，日後班基金芬佬肯定豬籠入水，保險商拎住筆錢，九成推入A股賭場搏殺，投資收益大增，股價將會更有睇頭，平保（2318）、國壽（2628）齊齊破頂，短線繼續睇升。
魏力
http://www.facebook.com/2012jason
魏力
異動空間 - 魏力 舊文
