中環在線：蔡志明鍾情天賦海灣
買全幢贈乖孫？
■蔡志明舊年多咗個可愛孫女（小圖）。
「玩具大王」蔡志明做生意之外，亦鍾意大手投資物業，佢持有超過廿棟九肚山物業，因而有「九肚山大地主」之稱，新近大家應該要加多一個朶畀佢，係「天賦海灣大地主」。
蔡志明三個仔女前年已經買入幾個大埔白石角天賦海灣物業，佢上個月再以自己同阿仔蔡加讚嘅名義，斥資三億元掃多一幢，係十座全幢十九夥。富豪買嘢真係似平民玩大富翁！
■蔡加讚（左）結婚時話，同太太汪圓圓生六個都冇問題。 資料圖片 
全家先後揼五億掃貨
蔡志明喺《福布斯》香港富豪榜排第十五位，身家二百八十億元，區區三億元對佢來講濕碎到好易忘記，所以上個月當孖屐傳出佢掃入天賦海灣十座十九夥，華華走去向蔡志明求證時，佢答話「唔係呀，啲人又亂咁傳」。
不過，土地註冊處最新就顯示，呢十九個單位嘅登記買家係蔡志明（Choi Chee Ming）同埋佢位公子蔡加讚（Choi Ka Tsan Karson）。
計埋今次，蔡志明一家人前前後後起碼斥資超過五億元，買入多個天賦海灣嘅單位，仔女都各自有份，不過今次明顯係偏心咗少少，咁重手買入一幢畀阿仔，唔通因為蔡加讚同太太汪圓圓舊年生咗個女，爺爺想留一幢樓畀呢粒四個月大嘅內孫女收租？咁汪圓圓繼續生，爺爺會唔會又買多幾幢呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
