魚樂無窮：炒股聽實震撼的聲音
■筆者指，2007年港股直通車瘋狂程度，依然記憶猶新。 資料圖片
墨超阿叔教落，人多擠迫地方有人跌倒時，要發出震撼嘅聲音，警剔外圍嘅人，免生意外，逼滿散戶嘅金魚缸又何嘗不是？唐牛股齡尚淺，對上世紀嘅重要人物金句認識唔多，踏入千禧年，最深印象同時影響力最大嘅，肯定係前總理溫家寶嘅煞車論！
2007年港股直通車瘋狂程度，依然記憶猶新，齋睇指數，兩個幾月升咗六成，講緊萬幾點。正當所有人都享受緊股市泡泡浴之際，溫家寶突然提出四大煞車論理據，其後股市有反彈冇升幅，跟住金融海嘯來襲，沒頂嘅散戶不計其數，唐牛係其中一個。馬後炮睇番，領導人講嘅野，肯定係最終決策，震撼性十足，點計都應該清倉離場，無謂拗頸。
唔講歷史，講最新情況。近排股壇有乜震撼聲音呢？起碼有兩單，第一，社科院話滬綜指今年可以睇5000點，回帶睇，社科院估舊年A股會出現1999年「5.19」爆升行情，全中！今次再畀貼士你，跟定唔跟，唔使畫公仔畫出腸啦。第二，總理李克強突然爆肚，話「滬港通之後應該會有深港通」。睇番滬港通，開通前H股係威係勢，開通後由龍變蟲；同一道理，大折讓深圳A股派對，會喺深港通開波後完結，如果有震撼的聲音話你知幾時啟動，一定要mark實。
是日繼續坐貨，冇推介。
唐牛
https://www.facebook.com/tongcow88
唐牛
魚樂無窮 - 唐牛 舊文
