魚樂無窮：尋找下一輪熱炒板塊
■券商大和早前出報告，唱好中滔環保；圖為集團主席徐湛滔。 資料圖片
資金繼續輪流炒，風電核電股全線起動，與其同人鬥搶，不如諗定下一輪炒乜，盡情演繹低買高沽藝術。按圖索驥，環保股中嘅水務股，已經橫行一段日子，追落後資金肯定唔會放過，當中又以中滔環保（1363）最吸引。
記得前輩教落，幾條移動平均線滙聚，往往係爆升前奏，中滔環保10日、20日及50日線，介乎7.84至7.91元，只得七格上落咁大把，沉寂咁耐必有一棍。
另一個大炒催化劑，非有政策支持莫屬。《水汙染防治行動計劃》（下稱水十條）傳已上報國務院，只要一聲令下即可出台，預期總規模達2萬億人仔，中滔環保最新市值只得113億銀，分到少少餅碎已經好和味。
中滔環保睇升22%
中滔環保為迎接大茶飯，亦積極擴軍，新近以6.3億人仔收購廣州市廢物處理業務，以今年保證盈利1億人仔計，收購市盈率僅6.3倍，具協同效應之餘，又可令市盈率回落，一炮兩響！
券商大和早前出report，大力唱好水務股，給予中滔環保目標價10.58元，潛在升幅35%，比起其餘推介北控水務（371）及康達環保（6136）均要高，看好之說不言而喻。唔貪心，以大和目標價打個九折計，可見9.52元，都有22%水位。
唐牛
https://www.facebook.com/tongcow88
唐牛
魚樂無窮 - 唐牛 舊文
