魚樂無窮：滙銀盈喜護身平靚正
■滙銀家電最近發盈喜；圖為主席兼行政總裁曹寬平。 資料圖片
阿爺放水，股民不領情，A股由頭沽到尾，埋單倒跌1%。港股有中移動（941）撐住，收市仍漲85點，但升幅蒸發近八成。大家都為反高潮搵解釋，有人話降準係預期之內，所以趁好消息出貨，有人話A股IPO又殺到，資金緊絀下要錢唔要貨。我嘅思維就好簡單︰中證監打壓孖展，A股由燦爛歸於平淡，但高位用孖展掃貨嘅大有人在，難得有逃生門，當然先沽為敬，A股爛尾收場，港股惟有焗跟。
A股由快牛變上落市，港股難有突破機會，卻造就個股發圍。舊年八月曾推介滙銀家電（1280），三個月炒高五成，如今股價重遊舊地，又係時候兜番轉。再簡述滙銀家電賣點，公司主打家電分銷及彩票銷售，市賬率一倍唔夠，翻查家電股同彩票同業，全部講緊溢價，滙銀家電十個超值！行業發展方面，創維（751）噚日出咗靚靚數據，刺激股價爆上，滙銀作為同業，想窮都難。彩票業務方面，最新喺江蘇省逾二萬個社區同萬五個老年家居中心佈點，順道與雲媒體電視合作做推廣，連汁都撈埋。之前阿爺嚴查彩票行業，雖令股價下跌，但同時加快行業整合，滙銀肯定受惠。
滙銀已發盈喜，業績打曬底，未來如果搞分拆，我絕不感意外，單計兩隻殼價都十億樓上，而家市值七億唔夠，呢轉博突破橫行區，上番七毫子樓上其實唔難。
唐牛
https://www.facebook.com/tongcow88
唐牛
魚樂無窮 - 唐牛 舊文
