中石化都死
2015/03/23 09:18:27
網誌分類: 經濟
中石化（386）公佈2008年以來最差全年業績，更為今年首季業績發出盈警。中石化去年純利大跌29.7%，跌至465億元人民幣，第四季更有虧損，蝕48.5億，而對上一年同期是賺138億。
在油價急瀉下，中石化的煉油業務去年由盈轉虧，全年有經營虧損近20億元，而前年則賺近86億元。
中石化董事長傅成玉解釋話，去年下半年原油價格斷崖式下跌，加上國內成品油零售價格連續11次下調影響，業績倒退。預料今年經營環境依然十分嚴峻。
中石化因而發盈警，指今年首季油價仍處低位，由於仍要消化高成本的原油庫存，故料首季淨利潤會按年大幅下降，預計將「處於盈虧平衡點附近」，意味將在賺蝕邊沿。
在三桶油中，中海油偏重上遊業務，按理最受油價下跌影響，中石油上下遊業務平衡，影響應較細。而中石油較多下遊分銷業務，本應是油價下跌的受惠者，可以沖銷上遊業務的損失，但如今中石化第4季都要見紅，其餘兩桶油都大鑊。
估計中石化咁樣，皆因上遊業務因庫存貴油大受影響，但下遊業務卻沒有因為油價跌受惠，因為阿爺逼住佢11次減價，所以就中棍。之前見中石化股價和其他兩桶油一樣一路跌，如今終於知道原因。未來油價還向下，估計佢仲要尋底。
另外睇睇美國，市場對聯儲局幾時開始加息的關注，以及美元匯價急升，令到美股今年大幅波動，據湯臣露透資料顯示，標普500指數今年的每日平均波幅達到24點，係2011年12月以來最高。
升個不停的美元匯價，令到美國經濟增長前景以及聯儲局加息的決定，添上不明朗的因素。自3月以來，美元匯價升勢尤其迅猛，由於強美元對美國出口及美企盈利不利，衝擊正在緩慢復甦的美國經濟，令市場憂心不止。美元匯價變動，便成為近期左右美股的主要力量。形成美元升，美股跌；美元跌，美股升的局面。好似上周五咁樣，反映美元兌6隻其他主要貨幣匯價的美元匯價勁挫1.5%，係2011年以來錄得的最大單周跌幅。美股造好，杜指升169點至18128點；標普500指數漲19點至2108點；納指亦重上5000點大關。
過去一年，美元匯價已經升了20%，令到以賺取外匯為主的跨國美企，叫苦連天。至目前為止，已經有50家美企為此削減了今年首季的盈利預測，而市場預期，下調盈利預期的美企仍會陸續有來。
事實上，美企已經預咗今年首季盈利唔係幾掂。據湯臣露透的資料顯示，預報業績會好過市場預期的公司數量與差過市場預期的公司數量的比例為1對5.5。呢個比例係去年同期以來最差，當時的比例係7.2對1。換言之，自己在預報中睇淡今年業首季業績的美企，比去年多好多！美企對今年首季業績咁悲觀，料將對股市帶來衝擊，美企4月初將公布業績，美股唔得，港股都可能會受啲影響，大家要小心啦。
美股上周五跟住美元回軟造好，美國預托證券的ADR港股比例指數比香港收市高198點。而美元匯價周末未見回升，兌歐元維持在1.0839美元，估計港股今日又會做番好啲。
陸羽仁
回應(0) 我想回應
陸羽仁 BLOG 舊文
