官媒唱好 大夾空倉
2015年03月19日
市場焦點集中在中國股市再破高位及美國聯儲局會議之上，究竟聯儲局主席耶倫會點講嘢？消息發表前，美股上上落落，市場情緒有啲緊張。市場估計耶倫會喺會議聲明中拎走「耐性」用語，若然係咁美國最快6月就會加息，呢次係自07年次按以來美國利率再次向上，對投資者心理自然有衝擊。
由於聯儲局早已向市場放風，外界對調整策略已有一定預期，所以金價、油價繼續尋底，不過，由於利息轉向始終係大件事，有預期唔等如完全無影響，所以投資氣氛難免緊張，香港好彩啲係內地個市升番，令到氣氛好番啲。
英國《金融時報》報道，世界最大對沖基金Bridgewater創辦人達利奧(Ray Dalio)就提醒，市場預期聯儲局改變貨幣政策走向，金融市場可能出現動盪，仲話?家市況跟78年前非常相近。
市傳人行增放水
呢位市場大鱷指出，1937年股市從經濟大蕭條復甦後，踏入第8個年頭，當年儲局剛結束為期4年的量化寬鬆措施。不過，儲局在1937年突然決定收緊貨幣政策，令金融市場逆轉，當年杜指暴跌超過三成，1937年3月31日低見98.95點，股市拋售持續一整年。大鱷呢個時候咁講，多少有出口術向儲局挑機的味道，暗示耶倫要小心做嘢。
港股呢個星期主要係靠國貨推動。官媒《人民日報》海外版亦發表文章，唱好A股今年底可以升穿4000點水平，推動A股向上。上證指數再漲2.1%，收報3577點，漲74點，創7年新高。深成指收報12496點，漲326點，兩市成交1.12億元，係第2日成交破萬億！個市好有夾淡倉味道。
內地證券界話內地股市係咁升，有四大利好事件或傳聞：1、央行再注流動性續作約5000億中期借貸便利MLF，降低銀行存款準備金和減息預期加強；2、A股開戶人數破70萬，連續2星期創年內新高，新資金趕入場；3、養老金入市在即，若成事放9000億元資金入市；4、中國計劃允許投資顧問代客操作，證券商料會加快發展財富管理業務。
內地股市破晒位，香港H股打折跟人升少少，睇落有少少唔開胃。恒生指數收報24120點，升218點，升0.9%；國企指數收11981點，升144點，升1.2%，升幅仍然低過內地的2.1%，預計未來A股續升，港股又係跟升少少。港股通股份中佳兆業(1638) 、中國聯塑(2128) 及順風清潔能源(1165) 升幅最大，各達10.2%、10.1%及8%。A股急升，帶動成交暢旺，二線券商股受追捧。信達國際(111) 狂升28.3%，造1.36元，是表現最佳港股；申銀萬國(218) 爆升18.34%，收6.26元；第一上海(227) 急彈7.59%，造1.56元。
香奈兒罕有劈價
市場另一個焦點，係Chanel罕有減價，在店外引來人龍。香奈兒一向獨領風騷，絕少會劈價救市，今次減價據講主要係同歐羅大跌、總部調整全球售價有關，故此在香港減價的同時，歐洲會相應加價，以反映美元強、歐羅弱的影響。
龍頭品牌早前已有名錶減價，方式都係歐加港減。呢個做法雖然係應對歐洲放水匯價大跌的影響，但對消費市場都有一定影響。有價減的品牌生意易做，管理層自然OK，其他品牌就要諗吓跟唔跟啦！聽名牌高管講，好多商場係同零售商拆數，咁商場分帳就會少咗，呢樣嘢就解釋點解九倉呢類商場樓面多的股份表現弱勢。
聽做地產的老闆講，?家佢哋對商業樓宇睇法有二分法，對商場前景普遍係淡啲，特別係做名牌奢侈品類別；對於寫字樓同工廈就看好，主要係好多內地企業會落嚟香港插旗，咁點都會租番個寫字樓用吓，而呢類物業新增供應唔係咁多，租售價好過其他物業。不過，陸羽仁講嚟講去都係嗰句，美國低息咗咁耐，?家醞釀緊加息，如果有得揀，係咪要揀買地產股呢？
陸羽仁
金融High Tea 舊文
