笑到最後：大反彈學會七件事
上周五突然大反彈，最多升超過600點，追貨追到氣咳，所謂個市行得快，一定有古怪，突如其來發功，逼你成長，有七件事，可以從大反彈中學會，並且用喺之後嘅波幅。
一、大牛市未變。
上星期沉悶，成交開始縮，有幾日係「港股大時代」以來新低，之前全民話三萬五，甚至四萬
、五萬點，呢啲聲音冇曬，有一部份聲音仲話要「炒股不炒市」，即係婉轉咁話大牛市遲到或者唔嚟，大家返去玩細價股。一記大升幅提醒大家，大牛市未完。
二、點睇見底？
馬後炮回顧，過去一星期，全城睇會跌穿27000點，由財演口風去到散戶，睇法由25000點至26800點不等，當全世界一致睇淡，加多一個離行離列嘅目標，咁就相當於見底。
三、短線見頂靠認威。
向前看，點睇短線見頂？始終牛市一定係大波幅情況上升，當有人認威話賺到錢，個市就會回，講呢番話嘅人越同股票冇關，越靈驗。例如「四月之星」係Janice Man、家燕等群星講買港交所（388）賺到幾多位數字；5月初有周顯大曬徒弟身家，即現六連跌；月中又有吳家順接受本報訪問講解旗下基金勁賺，見報恒指日即跌311點。當迷信又好，咁啱又好，信咗先，嚟緊再有呢類報道，食咁一半糊有著數。
升市三寶彈得最快
四、仲係外資主場。
上星期見證，港股同A股走勢相反。證明無論中資掟幾多錢落嚟，外資仍然係港股實際話事人，至少呢一刻，仲未捨得交番個場出嚟。相信會有啲似細個去街場踢波，打得贏我就交個場畀你。對一般人嚟講，外資繼續主導，等於股價仍要跟估值行事，A股點顛都好，H股唔值都要折讓，到個市重上上次高位時，毋須睇得太樂觀。
五、市場效率高，出手要快。
上星期減息、美債唱淡、中國經濟數字差等等，壞消息盡出，結果上個禮拜五即彈，未必代表港A股化，反而代表錢多咗，市場更有效率反映消息，當連中國數據差呢啲消息都出埋，冇更多消息推跌個市，個市就可以向上，消息反映得快只需要兩三日。結論係大時代，落決定要更加果斷。
六、重上28500點。
本欄相信跌勢已經過去，嚟緊一定係再挑戰28500點高位，然後升穿佢，到時務必靜候有人認威沽貨。
七、升市三寶繼續有料到。
本欄之前推介升市三寶：港交所、平保（2318）同埋騰訊（700），前兩者反彈一定有份，仲要係彈得快嗰隻，後者就喺跌浪中都守得住。升市之初，肯行一定係大價股，以港交所同平保秤先，暫唔推介細價股。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
