中環在線：四叔唔做大嘥鬼
荃灣千色店吉舖開12蚊店
■荃灣千色店嘅12蚊店只開兩個月。 高淑嫻攝 
近年市面上越來越多12蚊店出現，大家最熟悉當然係永旺（984）旗下Living PLAZA by AEON，仲有今年高調加入戰團
嘅759阿信屋，做慣大生意嘅恒基地產（012）主席李兆基（四叔）都有開12蚊店，實行大小通吃咁話呀。
四叔一直有經營百貨公司千色店，千色店旗下有6間千色Citistore。華華最近行經荃灣Citistore，就發現地下有個1,600方呎地舖由食肆轉為12蚊店「選の樂」，呢間12蚊店仲係由千色店自行經營。
■李兆基都有開12蚊店，實行大小通吃。 
■選の樂賣平價家品。 新租客未到
其實，千色店多年前已經喺大角嘴Citistore開12蚊店，舊年底再喺將軍澳店開多間，馬鞍山店之前都有，不過最近閂咗，將個舖位租畀其他客。荃灣呢間12蚊店係兩個月短期舖，因舊租客關門大吉，新租客未到，千色店本身擁有大量家品貨源，於是咪利用呢個吉舖開間12蚊店擴闊客路囉。
有趣嘅係，四叔賣樓做生意，嚇嚇講緊幾十億、幾百億；四叔舊年底將千色店由恒地賣畀同系上市公司恒基發展（097），翻查恒發年報，千色店舊年單係12月嘅營業額都有1億元（包括租金收入與零售銷售），點解會去開生意額好似細眉細眼嘅12蚊店呢？
不過老實講，12蚊店真係幾有吸引力，尤其係對女士，女人最鍾意濕平，買到平靚正嘅嘢就最開心，唔信？大家不防得閒走去各大12蚊店望望，經常人頭湧湧㗎，如果唔係有得做嘅話，四叔都唔會做埋一份喇，用間12蚊店吸引人入去百貨都抵喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
