魚樂無窮：突然爆升需要理由嗎
■米蘭站噚日下午衝到去1.62元後突然停牌。 資料圖片
每逢港股大升或大跌，傳媒總要找三大好消息或四大凶兆作支持理據，冇計，唔少散戶仍停留在問目標價嘅階段，面對升跌只用直線想法，要求原因去解釋。老老實實，大時代下資金大過天，好似上星期五咁，下晝忽然怒挾，
市場原因係深港通即將推出，雖然港交所（388）當日已即時否認有公佈，但港股繼續堅挺到尾，咁你又點解釋吖？
炒股角度出發，冇消息嘅爆升更令人期待，事關想像空間更大，升幅自然更勁。今日講兩隻無厘頭爆升股供大家參考。
第一隻︰威發（765）。上月底失驚無神發力創新高，業績好靚？「唔係呀，倒退喎。」跟細價股炒？「都可以咁講嘅，市值4億幾。」夠啦，殼價門檻都未過，兩大股東仲揸近七成，有淨現金揸手，極品也。仲有，2012至14年連派三年特別息，令現金急跌至4,906萬元，大股東盡袋現金後想點？你懂的！走勢上，股價近日沿住十日線行，入場玩可以此作參考水平。
第二隻︰米蘭站（1150）。2013年已開始有人傾買盤，經歷半年時間，無疾而終，多磨也成不了好事，股價自然不敵地心吸力，最低曾見0.5元，較高位蒸發六成。但本月突然發力，破埋之前傾賣盤時嘅高位。噚日下午衝到去1.62元後突然停牌，戰友宜睇實通告，如與賣盤有關，可以1.2元作計數位，小注怡情。
唐牛
https://www.facebook.com/tongcow88
唐牛
魚樂無窮 - 唐牛 舊文
