金手指：不問價追明輝
■程志輝任主席的明輝國際，可以不問價追。 資料圖片
噚日收市後十億身家都係靠股票賺來嘅老炒家朋友打電話畀我，原因係2013、14年孫柏文用「不問價追」或「一注獨贏」推介過四隻當時冇十億市值嘅公司，嗰四隻係CEC（759）、中慧（1143）、金寶通（320）、利記
（637）。噚日金寶通再飆升，用推介日開市價同噚日收市價計，四隻中三隻升超過百分之二百，所以噚日來電恭喜我。我反過來多謝佢，因三隻裏有兩隻係佢點我。而我問仲有冇呀？
即買即升合粉絲意
一問佢就笑。原來佢最鍾意睇我《蘋果》篇文啲讀者留言，睇啲人罵叉我。佢話就算我寫出來最後倍賺，啲人只要唔係今日買完即贏就會鬧。我聽到就搞笑問：「咁有冇啲即升呀？」點知佢好認真話：「即升好難。」佢話唔信技術分析，但唯一可信嘅就係升穿多年高位追入，因冇蟹貨。噚日有隻佢喺晏晝時加碼買。大家都知佢揀親啲股都要過到畢菲特師傅嗰關，即現價買如即執笠，還債、變賣資產後股東都仲有得賺，即要神級資產負債表。
即係邊隻？就係得七億市值嘅明輝國際（3828）。
該公司主要做大家住酒店時，房裏面嘅「日用品」如洗頭水、潤膚露。佢話一路留意其股價橫行四年、連今年4月都冇乜點升嘅公司，因幾年前盈利不斷跌，但有神級資產負債表。即係一扭轉就似金寶通咁升，一係繼續差就學中慧咁賣殼。
老炒家話第一次買就係今年初David Webb宣佈持有超過百分之五股權後（Webb4月再增持）。佢話上周已想加碼，但見一挑戰高位1.06元就狠狠被打落，諗住要靜一排，點知噚日就清脆俐落咁升穿。佢話手上咁多隻股份，最合我啲fans即升之意就係呢隻，亦話會最少上到每股資產淨值（撇埋啲冇料到「商譽」）加殼價即2.1元，離噚日1.12元收市價唔少。
中慧、金寶通都係老炒家畀嘅，呢隻就睇你信唔信佢同David Webb。信的話，就當然係不問價追明輝國際啦！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
