魚樂無窮：大時代抽水深層意義
■新華滙富剛宣佈以每股0.34元配售6.3億股，集資2.1億。圖為集團主席蔡冠深。 資料圖片
傳統智慧告訴我們，企業頻抽水乃股市見頂先兆，一來反映管理層認為已到價，寧願袋袋平安，二來股市水源遭分薄，爆炸力大打折扣。最經典例子2007年大牛市信置（083）及
新地（016）連環批股，之後個市有幾衰，相信你哋清楚過我。
今次大時代又點？首先，批股消息只屬零星，集資額亦不多，有排未到「抽散個市」階段。再講，資金充裕程度前所未見，配股供股變成低吸良機，無怪乎消息公佈後，股價往往不跌反升。炒友更坦言，批股供股旨在增加大股東籌碼，希望貨源歸邊後，再大幹一番。
今日推介券商股新華滙富（188），亦屬批股一族，剛宣佈以每股0.34元，配售6.3億股，集資2.1億。雖然大市單日轉向，但新華滙富腰力十足，埋單只跌一格，低吸盤不絕乃不爭事實。近期券商抽水後，往往有驚人升幅，其中華富國際（952）更隨即獲民生商銀垂青，飛上枝頭變鳳凰。呢條「批股+賣殼=大炒」嘅黃金方程式，絕對可以套用在新華滙富身上。事關公司揸fit人蔡冠深家族，雖然低調，但身家保守估計過百億，實力指數爆燈。身兼政協委員嘅佢，曾獲江澤民、胡錦濤及習近平等多位領導人接見，人脈關係強到你唔信。大炒條件已備，畀17%溢價（現價與批股價差距），可以買一幅風光無限潛力圖，仲唔去馬？
唐牛
https://www.facebook.com/tongcow88
唐牛
魚樂無窮 - 唐牛 舊文
