中環在線：有免費電視牌在手 信心爆棚
小小超唔怕賭後撈過界
■李澤楷噚日心情大靚，仲首次開腔話對開台有信心。 
香港免費電視再起風雲，已經獲政府正式批出免費電視牌嘅小小超李澤楷，噚日對於「賭後」信德（242）董事總經理何超瓊，夥拍
「老虎仔」遠東發展（035）邱達昌等人組財團擬申請電視牌照，就有信心咁話，「我哋一定會盡心盡意，希望可以帶到新啲嘅節目畀大家！」
有信心一年內開台
雖然小小超冇正面回應點睇其他對牌照虎視眈眈嘅對手，但佢講嘅時候諗都唔使諗，一睇就知佢信心爆棚，無他，因為佢嘅「香港電視娛樂」暫時仲係唯一一間有牌照嘅電視台，其他對手包括有線（1097）、港視（1137）就唔知要等到何年何月嘞。
電盈（008）喺4月初講過，有信心喺一年內成功開台。但小小超噚日被問到確實開台日期，就冇洩漏風聲，只係話「我哋公佈嘅開台日期，我哋好有信心……我諗你（遲啲）會睇到我哋有public announcement（公告）」，咁大家惟有繼續捱住TVB一台獨大先嘞。
佢嘅另一間上市公司盈大地產（432），自從上年4月賣咗北京盈科中心套現72億人仔之後，就冇咩業務淨低，而且一直冇咩動作，小小超就話，盈大地產會「一路繼續專注喺房地產」，賣完北京項目之後，亦暫時唔會再有考慮出售資產喎。之後佢就同傳媒揮手講拜拜，留低好多疑問。咁大家惟有估嚇佢下一步會唔會注資、或者將咩業務注入去盈大啦！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
