異動空間：盡派盈利超筍股
深港通再食詐糊，短線炒友急忙掟貨，加上希債談判破裂，美國聯儲局議息前，資金繼續撤出新興市場，連A股都頂唔順急隊，港股四面楚歌繼續捱打，暫時熄機忍手為上策。
成交得番1,165億銀，創4月初大時代以來新低，反映沽壓不算強，但承接買盤更弱，呢種陰跌最攞命。戰友如
上周跟指示減倉一半，暫可按兵不動，但如穿埋上周低位26573點，則應進一步減持，以防A股冧市火燒連環船。
市弱不妨睇嚇業績股，老牌紡織股德永佳（321）去年度賺7.7億銀，按年增長16%，扭轉過去三年盈利倒退的劣勢，現價8蚊，PE約14倍，雖不算超平但絕對揸得安心。最亮眼之處係派息比率，由2013/03的74%，升至2014/03的98%，今年更升至100%，即係賺1蚊派1蚊，股息率7厘，對「好息之徒」極為吸引。手頭仍有43億現金，高息、特別息料陸續有來！
再提一樣嘢，主席潘彬澤年屆67歲，早於前年已辭任董事總經理一職；其弟潘機澤亦於本月起辭任執行副主席，具有家族逐步淡出之意，派高息盡袋現金，莫非是為股權變動作準備？
魏力
http://www.facebook.com/2012jason
魏力
異動空間 - 魏力 舊文
