魚樂無窮 - 唐牛 2015年6月16日
魚樂無窮：三個抽iBond的理由
■新一批iBond據聞下月公開發售。 資料圖片
新一批iBond據聞下月公開發售，基本上同以往幾次一樣︰年期3年、發行額100億、半年派息一次。「大時代喎，你同我講抽iBond？」無錯！今次抽iBond嘅決心，仲要比以往堅定。點解？三個理由慢慢數過你聽。
1）鎖定炒股利潤：股市雞犬皆升，贏錢固然開心，但懂得保住利潤，先至係致勝關鍵，貪勝不知輸，後果大家想像得到。以往套股換樓乃指定動作，但而家樓價貴回報低，風險打孖上。睇番幾批iBond最新派息，全部四厘樓上，兼且接近零風險（除非香港政府破產），用如此低風險高回報產品鎖定炒股利潤，一流！
2）逆向投資思維：根據非正式統計，唔少散戶寧願留彈藥炒股，都唔抽iBond，逆向思維話畀我哋知，股市風險越來越大，將投資多元化絕對唔係壞事。如果今次認購反應冷淡，中多幾手長揸又得，即日食糊袋住先亦得，得咗！
3）對沖無能政府：梁振英政府表現如何，大家有目共睹，袋住先、慈母、雙非……種種問題越諗越㷫。可惜你每年都要供養呢班人，好彩有雙糧就成份用嚟交稅，唔好彩仲要籌旗。買股票又收你稅，買樓又收你稅，去公立醫院輪街症咩？睇完大台三線劇集加晚間新聞，你都唔會見到醫生嘅身影。難得而家肯派錢，梗係唔好執輸，一於抽抽抽，講完！
唐牛
https://www.facebook.com/tongcow88
唐牛
魚樂無窮 - 唐牛 舊文
