情陷夜中環 - 葉朗程 2015年6月1日
情陷夜中環：蠢得起
■為咗福臨門，我同一位叫Richard嘅朋友喺email拗起上嚟。 資料圖片
有些人被批評後，會感到無地自容，於是用錢築起最後的防線，試圖捍衞自己的尊嚴。這些所謂有錢人，有時真的窮得只剩下錢，沒甚麼品味或知識可言。呢個世界，唔係有錢就大曬。有錢還有錢，知識還知識，品味還品味。
認識一位朋友，他有句口頭禪：「你知唔知要幾多錢呀？」純看文字，很難領會到他的語氣。「你知唔知要幾多錢呀？」不是詢問，而是反問、設問、質問。這個朋友很喜歡買東西，差不多每個月都有一兩件非買不可的心頭好。但他的品味實在讓人不敢恭維，所以每次他花了一萬幾千，甚至乎十萬八萬，買下一件衫、一個袋、一隻錶、甚至乎一部車之後，我們幾個朋友就會忍不住跟他說：隻顏色咁核突嘅？個款咁「娘」嘅？啲花紋成個阿叔咁嘅？
從我們的批評，你大概可以想像到這個朋友跟我們是很熟的，不然我們也不會膽敢做個如此口沒遮攔的好事之徒。
除了這個朋友的品味真的奇差之外，我們經常毫無保留地對他進諫的另一個原因，是他每次受到猛烈抨擊之後，那個反應都是很cutie的。脹紅的臉露出青筋，眼角肌肉不自覺地猛烈跳動，兩片嘴唇微微地開開合合，最後在5秒之內，他就會忍無可忍說：「呢件衫個pattern似阿叔？你知唔知要幾錢呀？」
為甚麼提起這個朋友？因最近在公司，也遇到一個跟這位朋友差不多的同事。性格很像，語氣也很像，讓人吃不消。為方便敍述，就叫這位朋友做Richard。通常呢啲角色，除咗Richard之外，都唔會有第二個更適合嘅英文名。
付得起錢不等於識享受
話說，有兩位倫敦同事將會來港協助某些事宜，計劃待好幾天，公事上的行程早已安排妥當。下周三，我、Richard、還有兩位香港同事約好跟這兩個倫敦訪客一起晚飯。既然有朋自遠方來，當然要選個靚地方好好招待一番。於是，有份吃飯的其中一位女同事就發了電郵給我們三個，也cc了兩位秘書，主要是為這次飯局提議地點。電郵內容全部英文，我嘗試用最貼近的語氣繙譯。
「我assume中國菜好過日本菜啦right？金葉庭，7點半6位，ok？」女同事1號問。過了15分鐘，女同事2號快人快語：7點有call，you guys go ahead first，預我8點3到。正當我想回覆和議之際，Richard早我一步說：「Why not福臨門？」坦白說，我也覺得福臨門是一個不錯的提議，於是我說「金葉庭和福臨門都一樣好」，兩個選擇也沒問題。
怎料，他之後竟然這樣回答：「金葉庭同福臨門一樣咁好？You must be joking，嚟香港食中國嘢，仲有邊度好得過福臨門？」嘩，呢嚇真係火都嚟埋，I must be joking，咩態度？一路都知呢個Richard出名寸，但勢估唔到係寸成咁。仲有邊度好得過福臨門？
言下之意，是福臨門全港第一？香港吃中菜的地方何其多，福臨門憑甚麼是第一？於是我說：「與其要吃福臨門，為何不帶他們去家全七福？」福臨門的故事，很多人都應該聽過。因為家族成員出現意見分歧，福臨門的其中一位股東、負責管理廚房的「七哥」，另起爐灶，開了家全七福。
Richard一聽家全七福四個字，很大反應：「福臨門已經咁多十年，家全七福開咗幾耐？呢間邊會夠福臨門正宗呀？」
人哋七哥，毛都未出齊就跟住老竇學廚，家全七福又豈有「不正宗」之理？再者，福臨門以前喺日本、大陸嘅分店，𠵱家都改曬名做「家全七福」，話家全七福唔夠正宗嗰個就真係唔夠正宗。本來好地地約食飯，𠵱家搞到翻來覆去廿幾個email都未有定案。女同事和女秘書見到兩個儍佬你一言我一語，肯定喺度陰陰嘴笑食花生。
最後一個email，Richard出王牌：「如果福臨門唔正宗，大劉就唔會𠵱家都仲日日去食啦。」大劉去食又如何？大劉腦筋快、賣樓叻、投資準、個人出曬名有情有義、生出嚟個仔仲識得教人唔去日本旅行就買到樓，但那又如何？有錢人就代表識食嗎？你有錢過我，就代表你比我更懂得何謂美食？
我最後的回覆：「假如一個人的身家與其飲食品味成正比的話，那家全七福就肯定比福臨門更值得一試。你不可能不知道吧？自從家全七福開檔後，郭鶴年先生已經不去福臨門了，改為幫襯七哥了。郭生有錢啲，定劉生有錢啲？你唔會唔知啩，Richard。」
付得起錢，並不等於你識享受，有時只代表你蠢得起。
葉朗程
葉朗程
情陷夜中環 - 葉朗程 舊文
