笑到最後：A股獲利受惠股
中央匯金減持工行（1398）同建行（939）A股，上星期四大市畀佢掟最多800幾點。高明相信真正考驗，係今個禮拜。
再勁嘅牛市，都會有牛市調整，有原因嘅跌，一啲都唔可怕，例如減息降準後急跌，你會知係好消息出貨，但人行寬鬆取向未變，仲有得炒。又例如上星期匯金減持
，開市時段可能覺得係中央食糊，但瞓一覺諗清楚，炒高個市係為抽水，明顯國企中央到今日未抽夠，照計唔使太驚住。
上個禮拜五，2001年以來滬綜指單日跌幅超過半成，翌日反彈機會率有八成。星期五滬綜指收跌0.18%。而家係大牛市，跌一成，平貨喎！仲唔掃？橫掂都睇滬綜指一萬點。
咁明顯嘅訊號，追貨力度唔足，大陸人都對再上有懷疑，連衝上5000點都有咁大阻力，按照大陸乜都搶返餐、毫無耐性嘅國情，捱多兩日A股都仲係無料到的話，部份長買長贏嘅A股股民會開始撤退，炒股冇錢賺，不如去嘆嘆。
A股過去幾個禮拜喪升時，對港股幫助只係得條毛，以成交比例，就好似一架貨櫃車拉架電單車，但架電單車竟然拉兩下前，倒後一下。最恐怖係冇原因下跌，於是大家就會開始胡思亂想，估嚇係咪牛市已完，又或者中央割禾青，最壞諗法，就係覺得大陸已經有新沙士疫情、有人隱瞞疫情等等，呢啲傳言，只要個市連跌兩三日而冇原因就會散佈。
下一浪炒地產股
呢排覺得股市冇咁順，應將目光由恒指A股同細價股股價，轉移到樓市指數，係，你冇睇錯，中原城市指數140點，繼續高位，完全無懼A股大跌定加息。可能有人會話，唔睇戲唔去日本，都唔慌買得起樓。但實情係，買家用錢去推高呢個指數，唔單止咁，呢個指數只係反映二手藍籌屋苑，一手樓收票收到手軟都反映唔到。
呢大半年，喺辣招史無前例咁勁嘅情況下，竟然冇地產商同代理呻減辣，因為今年首5個月，一手成交超過7,000宗，按年升26.8%，創10年新高，忙住做生意，冇人得閒抗議。樓市政策逼人買一手樓效果已達。再加上，A股咁多人贏錢，中國人賺到錢，一定會去炒貴其他地方嘅樓，香港樓市一定直接受惠。
匯金減持工行建行，新地（016）、信置（083）、恒地（012）呢啲地產股陪跌，明顯冇關係，香港樓市更會受惠A股股民獲利。下一浪要炒，一定炒本地地產股！
一齊笑到最後，即上facebook專頁：
https://www.facebook.com/bigricetea
高明
本欄逢周一刊出
高明
笑到最後 - 高明 舊文
