中環在線：
外表俊朗 曾拍短片籌款
渣打新CEO除衫爆肌
■溫拓思（中）喺辦公室除衫爆肌，非常吸睛。 互聯網
■好有明星相嘅溫拓思，仲好唱得。 渣打集團（2888）新任行政總裁（CEO）溫拓思（Bill Winters）做呢個位之前，
做投行高層多年，除咗做到嘢，亦好玩得，曾經為英國一個劇院籌款而一展歌喉，仲要唱到除衫show肌，認真估佢唔到！
今年53歲嘅Winters頭髮濃密，外形相當charming，有幾分明星相，仲好有表演慾。
晤中港星高層
佢喺2013年有份參演一條籌款短片，片中佢與另外4人飾演番自己，即係賓架，建議做一套關於賓架夜晚走去表演脫衣舞嘅音樂劇，佢哋即席高歌一小段，唱到興起仲除衫爆肌，Winters仲有一句高音solo，仲唱到鬼咁high，完全樂在其中呀。
不過，銀行高層一向畀人較為嚴肅與慎言嘅形象，Winters𠵱家去咗渣打做CEO，睇怕以後未必有機會睇到佢咁奔放嘅演出了。
雖然佢今年5月正式去渣打報到，本月10日先至坐正做CEO，但聞說佢4月底，已經旋風式到訪中國、香港、新加坡拜碼頭，跟高層員工見過面、打招呼。Winters當時表達嘅意思，都係要搞好回報、精簡運作、善用資本之類。
呢位新帥能否搞好渣打盤數，大家要拭目以待，但據聞佢好得英國監管機構歡心，冇他嘅，2008年金融海嘯，翌年佢就離開摩根大通，轉投Rothschild家族支持嘅投資公司，又幫英國銀行業獨立委員會（IBC），有份撰寫分隔銀行（Ring-Fencing）建議，通曉銀行情況，難怪渣打公佈委任Winters當天，英國國會財委會主席Andrew Tyrie都話深慶得人。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
