陸羽仁 BLOG 2015年6月22日
留後路
2015/06/22 08:26:58
網誌分類: 經濟
歐盟峰會今日展開，市場憂慮希臘與債權人就債務問題，仍然傾唔掂，希臘將可能被踢出歐元區，加上美股上星期五係「四巫聚首日」，美股收低，杜指跌100點，收報18016點；標普500指數跌11點，收報2110點；納指跌16點至5117點。
所謂「四巫聚首日」，即係股票指數期貨、股票指數期權、個股期權和個股期貨合約同時到期的日子，傳統上，美股波動會較平日劇烈。而美股上週五下跌，但跌幅溫和，三大指數跌幅0.3%至0.5%不等，撇開「四巫」這個影響，美股對希臘是否「脫歐」，反應其實唔大。再睇埋股票恐懼指標VIX指數升6%至13.96，仍保持14點下方，反映市場對後市仍然比較樂觀。
今日召開的歐盟緊急峰會，係希臘取得新一輪救援資金的最後機會，如果希臘交唔出一份令歐盟領導人滿意的金融改革方案，將無錢償還月底到期的17億美元國基會（IMF）欠債。目前，由於已出現大量存款流出希臘的狀況，單係上週五一日，就有12億歐元存款流走，歐洲央行已擴大希臘銀行的緊急資助，希臘央行可能會實施貨幣管制。而希臘總統齊普拉斯卻仍然堅持希臘在歐元區的位置將會仍然穩固。
投行Janney Montgomery Scott?首席投資策略師Mark Luschini認為, 睇唔到希臘可以提出任何解決問題的方案，結局衰硬！而市場預期歐盟領導人將研究希臘違約的善後工作。
上週五市場可能已經預咗希臘違約，甚至「脫歐」，所以股市變動不太，債價慢升，10年期美債債息由略穿2.4厘的高位回落到2.28厘，都見到資金由股市轉到債市避險。可以話，預期歸預期，到希臘真係違約，並且「脫歐」，預計仍會股市造成一定的拖累。但我覺得希臘「脫歐」對後市係一件好市，因為希臘危債呢把吊係半空接近兩個月的「懸劍」，終於跌落地下，投資者可以鬆一口氣，如果美股真係因此插一插，反而係入市的好機會。
講到跌市，美股比起內地股市，真係毛毛雨而已。內地股市近排由高位5178點之後跌跌不休，分析界普遍認為跌到4600點，應該有唔錯的支持，點知上星期齊五上證綜指一插就超過300點，收市4481點，跌幅6%！全個星期累計跌幅達到13.3%！創下自2008年6月以來的最大單周跌幅，上海深圳兩市市值本周蒸發約8.8萬億！
內地股市跌得咁悽慘，後市分析亦各有不同，例如內地英大證券研究所所長李大霄就話，內地股市泡沫已經開始破裂，正出現「地球頂」，他強調，這次的大跌是價值的回歸而並非調整，呼籲投資者降低杠杆。佢補充，「地球頂」往往係好有陷阱，因為「估值過高的部分股票股價將經歷漫長的回落過程，而部分被低估的大小藍籌將還有一定的上漲機會。」好易錯判形勢，相反，「鑽石底」則是淡友陷阱。
不過，又唔係人人都睇得咁淡，興業證券首席策略分析師張憶東認為「牛市將延續三到五年」，A股牛市趨勢不變，下半年將換擋進入第二階段。睇好原因包括一、居民存量財富再配置仍有較大空間；二、改革有序推進；三、對外開放加速等幾個方面尚未發生改變。但要留意?係A股絕不會一路「瘋牛」，期間或出現季度性調整。
我估A股無咁快出現「地球頂」，但炒A股也好，炒H股也好，炒股仔也好，若然買中隻股曾經瘋炒，一倍一倍咁升，摸頂買咗，見到佢回落10至20%，都要斬倉止蝕，因為隻股升咗以倍計的話，跌一半唔出奇，即使未爆泡，大型回落都可以殺人，特別係買衍生工具或炒孖展者，內地湖南長沙有個股民炒中車A股輸到跳樓，就係一大教訓。炒股，即使係牛市，都留少少後路俾自己好啲，否則熊市來時輸到跳樓仲抵死，牛市回吐都要跳樓，就死得唔抵啦。
陸羽仁
回應(0) 我想回應
陸羽仁 BLOG 舊文
