A股弱H股強日子快到
2015年06月22日
上周五出現一個A股小股災，上證綜指跳崖式插水，暴跌6.4%，收4478點，即係一周內從高位5178點直插700點，高位回調13.5%，不少內地股民出現「滿倉踏空」之痛。
市場人士總結四大利淡因素，導致A股高位殺跌。首先，新股加速發行，
特別是大股上市的抽血效應更加明顯。我上周講過上星期大量內地新股上市，估計凍資6萬億，個市就易跌難升；其次，監管機構嚴查「場外配資」入市，內地正式孖展借貸叫「融資」，場外孖展叫「配資」，可以借大到本金3、5倍甚至10倍去炒股。據不完全統計，如今內地場外配資資金規模起碼有5000億，阿爺出招查場外配資，是這一輪內地股市大調整的元兇。
嚴查配資 跌市元兇
第三，隨着半年結快到，企業結算和銀行繳款等需求將在6月30日集中爆發，資金將會變得緊張，令入市者有戒心；最後，今年來內地股市升幅巨大，特別是創業板指最高漲幅達170%，泡沫味漸濃，上證綜指在3月再升穿3400點後，一直沒像樣的回調，今輪殺跌係久違了的調整，殺跌正正是釋放前期巨大漲幅累積風險的過程。
我話成件事係內地個市升得太急太快，阿爺要令佢合理回調。今年1月內地股市升到3400點左右，阿爺見個市升得咁癲，出招查證券行，搞到內地個市急回，之後股民大鬧政府，話政府干預股市。3月後內地股市連番急升，阿爺沒有再明顯出手，無人大力操控，內地個市就見好不收，一路向上，一直沒有像樣調整，4月尾和5月尾的兩次回調，分別只跌360點和330點，回調10%也不夠，每次調整三幾日又再急升破頂。大市由2月低位3075點，急抽到6月中高位5178點，短短四個多月升了68%，雖然我都係內地股市睇好派，都覺得咁短時間咁大升幅，並不健康。
阿爺想股市升，但係亦唔想股市癲，見內地股市大升特升時，即使唔出明招約束，都出暗招，例如放大量新股上市集資，增加供應，吸乾水源。又查非法孖展，煞停場外配資。搞得幾搞，個市就力盡下插。
A股回調 撈底莫急
咁未來內地A股走勢又會點？我擔心今次會有較長調整，唔係好似過去跌一兩日就調整完。由於過去A股跌一兩日就升，今趟一跌有好多人去撈底。上周五香港比平日用多好多「滬港通」北向買股，另外滬深300指數上周五跌6%，但在港上市的滬深300指數基金如標智滬深300基金(2827) 只跌4.9%，安碩滬深300基金(2846) 只跌4.4%，跌幅比指數低，都見到有本地資金睇好內地股市撈底買貨，但要小心內地股市今趟無咁快調整完，太快去撈可能要捱價。
內地方正證券話，隨着市場持續調整，賺錢效應進一步減弱，蝕錢效應進一步增加，將導致市場供需失衡狀況加劇，上證綜指30日平均線可能難以起到有效支撐，此次市場的調整幅度和時間跨度，可能超過這一輪上升行情以來的數次調整。方正證券建議嚴格控制倉位，控風險，持倉較高者逢高堅決減持高價高估值股票。
健康調整 還可下探
根據彭博數字，上證綜指在5000點以上的高位時，市盈率(PE)已有近25倍，雖然相距2007年高峰近50倍仍遠，不過深成指數的PE已高達54倍，超越2007年的高度，逼近09年逾60倍高位，深圳創業板PE更高達123倍的歷史最高水平，所以出現深度調整並不為過。若然你揸住成手深圳創業板的貴價股，家遇上大市初跌，當然係應該減倉而唔係撈底啦。
睇上證綜指，即使唔係以去年起步位2400點計，而係以今年2月的低位3075點計，升到6月中高位5178點，升咗2103點，家4478點，只係回調咗升幅的33%，回調幅度一啲都唔多。若然回調升幅的50%，也要回到4126點，我覺得較有機會是出現這種深度的調整(按高位回調20%計，也可以回到4142點)。
若然回調升幅的67%，就要回到3768點，雖然機會較細，但亦不可不防。內地股市即使只係健康調整，唔係爆泡，都還有下探的水位，未來先要看近6月底半年結內地上海銀行同業拆息進一步扯高時，守唔守到4100點呢個位。
中港兩地 深度價差
內地A股唔掂，卻唔代表香港H股好差。正好相反，我估未來有一段日子會世界輪流轉，出現A股弱H股強的狀況，雖然不至於內地跌香港升，但香港不一定會跟內地跌，主要有兩大原因，第一是聯儲局加息和香港否決政改的負面消息已釋放消化，第二是中港兩地股價價差好大。
價差問題值得關注。我早一個星期已經講過，部份內地基金在上證綜指5000點樓上沽貨走資到港股，因為他們覺得內地股票貴、香港股票便宜。深圳市摩銀投資董事長李偉斌就估計，這次的A股回落幅度將很大，時間有點長，後市將維持一個大箱型整理，從A股流出的資金很有可能進入宇宙估值最低的港股市場進行炒作套利。
形容港股為「宇宙估值最低」都相當趣。李偉斌話，「白菜價的金蝶軟件、中國軟件國際等等僅僅是A股市場同類公司股價的十分之一，配合中央政府奪取港股定價權的戰略，也算是愛國之舉了。」
炒股講到咁政治化，陸羽仁唔係好識，不過佢講到兩地股價差距，卻值得注意。金蝶(268) 上周五跌2.7%，收5.09元，市盈率53倍﹔中國軟件(354) 上周五跌4.5%，收4.71元，市盈率35倍。
以在內地上市的同業巨頭用友網絡(600588)為例，佢去年盈利市盈率是116倍，由於用友是市值762億人民幣的大型軟件服務商股，在內地市盈率已較低，中小型股市盈率更高。好似147億港元的金蝶和96億港元的中國軟件呢類中型公司，在內地百幾二百倍市盈率唔出奇，所以話香港上市軟件公司股價只是內地十分之一或者有點誇張，但係只有內地同類公司股價二分一至四分一就一啲都唔出奇。
講開又講，金蝶和中國軟件本身質素唔錯，只係早前跟內地升得好急，有啲貴。佢哋都屬於強股，在跌浪中回調幅度唔算深，不排除未來仲可以跌多少少。
金蝶中軟 內地睇好
有人問我跌市買乜好，我就話低吸強股，唔好低吸弱股，有啲弱股跌到散晒，好明顯大戶的炒作資金走清，變成散戶自己同自己玩，蟹貨好多，即使大市過一頭半個月調整完再向上，大戶炒作資金都未必會再炒那些弱股，因為它們段段有蟹貨，比較難炒，一炒上去，又有好多人出貨，資金都會避開這些股份。宜放棄弱股，留意強股回調狀況，分段候低吸納。
陸羽仁
金融High Tea 舊文
