中環在線：富二三代搞慈善泳賽
吳宗權鐵定再騷肌
■吳宗權身形fit爆，輕易成為慈善泳賽焦點。 資料圖片
本地富豪二、三、四代一年一度公開「騷肌」嘅「公益金會德豐百萬泳」，仲有幾個月又到喇。舊年吸引到唔少城中富豪後代，齊齊為善事出海遊返轉，變相亦都係大家食住花生，睇嚇班富豪「騷肌」嘅
好機會。
■馮裕津、孫道弘同李民橋都話好想參加喎。 資料圖片 李民橋馮裕津都話想遊
話說活動籌委會，由會德豐（020）主席吳宗權、利豐（494）馮氏家族嘅馮裕津、東亞（023）副行政總裁李民橋，同埋中港照相（1123）副主席孫道弘，四大公子組成。舊年除咗李民橋唔舒服，無落水之外，其他3位都有參賽。
聽講身形fit爆嘅吳宗權，身體力行繼續參賽，舊年佢遊公開賽攞到第2名，一身倒三角身形唔止睇得，仲好遊得㖭。至於，其他3位公子聽講話都好樂意遊埋一份，但係要睇時間就唔就到，唔知係咪驚拍埋吳宗權度，身形可能輸一截呢？
其實呢個慈善泳賽近年都搞得有聲有色，仲一年比一年多本地富豪落水㖭。舊年有行會成員陳智思參加領袖賽，雖則成績麻麻，但估計佢咁注重健康，早排仲喺NBA球星「林瘋」林書豪訪港期間，同對方鬥返場波，今年無理由唔落場遊多轉啩。
舊年咁多富豪N代參賽，好多平日著西裝，唔係咁睇到身材係點嘅公子，一次過曝光曬出嚟。好似華置（127）主席劉鳴煒估唔到有個肚腩仔，如果今年繼續落水，以佢咁認真、唔服輸嘅性格，睇嚟可能都會操一操fit自己喇。今年比賽就喺10月25號喺淺水灣搞，費事暑假期間，畀颱風影響。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
