中環在線：
離開股壇半年 陸東復出
現身財經清談節目
■陸東現身財經清談節目，會講股講樓，並分4集播放。 資料圖片
好鍾意專訪「星級」分析員陸東嘅財經雜誌《iMoney》，年初封面大大隻字寫住「暫別贈言」，因為佢雙親不幸相繼逝世，無心戀戰下摺咗個基金，之後又要離開香港去旅行。離開咗香
港魚缸半年嘅陸東復出，上耀才財經台，大家又有神級tips袋落袋。
講股樓及古董
今次耀才搵咗佢上「名人酒杯」節目，聞說今次係參考「志雲飯局」嘅清談節目。陸東好快應承咗，喺訪問會講股講樓，7月13日起分4集播，海報上面寫住「有陸東，投資唔駛盲中中（舂舂）」，又話佢係「投資界神算」。
睇返佢最近一次接受訪問，預測今年恒指大概會喺23000至26000點，噚日港股險守25000點，又幾準喎。
之不過個訪問喺2月底25000點水平做，港股喺兩個月內升咗3500點，呢個預測有啲盲舂舂。
喺節目入面，陸東仲會講埋佢從未公開講過嘅嘢──玩古董，佢話：「收集古玩一定要專」，仲貼咗「道光官窯」幅圖，唔知近年睇市麻麻地嘅佢，睇古玩眼光有冇叻返少少。
LAM仍持資產管理牌
耀才宣傳陸東上佢哋節目嘅時候，仲提起佢係Look"s Asset Management（LAM）創辦人，話說佢年初講要賣盤，公司網頁已經無咗，佢隻Absolute Return Fund二月底已經無再update，究竟賣唔賣得成？
證監會網頁顯示，LAM個「就證券提供意見」嘅4號牌，上周四已經過咗期，值錢嘅「提供資產管理」9號牌仲喺度，咁即係賣咗定未賣箒？留名等睇陸東嘅回應啦。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
