中環在線：以視像談洩密感受
斯諾登後悔太遲爆料
■斯諾登（屏幕中）「化身」裝上屏幕嘅機械人，喺後台行出嚟同觀眾打招呼。 讀者提供圖片
里昂每年一度在港舉行投資論壇，定必請到猛人做演講嘉賓，今年嘅嘉賓夠曬猛，就係洩密嘅美國中情局前僱員斯諾登（Edward Snowden），佢身處俄羅
斯，噚日透過視像會議解釋當年爆料嘅原因，又講笑話，逃亡後，唔使諗退休問題。
■尼古拉斯基治大談做人道理。 笑言唔需要計劃退休
斯諾登噚日嘅出場安排十分特別，雖然大家預咗一定係視像會議，不過大會並唔係就咁開個大屏幕，而係先安排一個掛住屏幕嘅機械人行出嚟，同主持人打個招呼後先至正式開始。
斯諾登睇落精神唔錯，keep到個靚仔樣，佢大約用咗25分鐘講自己當年爆料嘅原因，之後就接受現場觀眾提問，台下大約提咗7至8條問題，包括問佢有冇後悔爆料，佢就話，最遺憾係冇一早爆料。
好多人亦關心佢𠵱家喺俄羅斯嘅生活係點，佢講笑咁話「𠵱家唔需要有長遠計劃，亦唔使諗退休問題」雖然台下觀眾即時爆笑起來，但大家心裏明白，斯諾登流亡到俄羅斯，咁樣講只係一種黑色幽默。
斯諾登承認，當年經香港去俄羅斯，心裏面的確有些少擔心，但去到發現情況冇想像中咁差，佢都會繼續表達自己意見。而且，今日科技發達，佢可以透過科技跟外間保持聯繫。
里昂論壇有另一個場合，金像影帝尼古拉斯基治（Nicolas Cage）真人現身，咁啱得咁蹺，佢有份參演電影《Snowden》（未上映），不過佢噚日主要講演戲與做人嘅道理，大會亦冇安排佢跟斯諾登同場對話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
