金融High Tea 2015年9月17日
發功遏加息
2015年09月17日
美股隔晚高收，帶動港股造好，午後連內地股市都爆上，結果港股爆上五百幾點，一於在聯儲局開會前就搶閘夾上。
九月份聯儲局會議事關重大，睇嚟美國商界，都全力發功希望阻遲息口上調，大行好似高盛出口術話油價要見20美元、又警告會打擊經濟外，大企業仲有埋實招，宣佈裁員。
新一輪宣佈裁員的美企，有通用電氣和惠普，通用電氣做法係移走美國500個職位，呢個數目細細哋，不過都係一種姿態。惠普落刀大力啲，初步斬二、三千人。聯儲局加唔加息，其中一個重要考慮係就業市場，美企?家係咁公佈裁人，你話係咪有多少一矢雙鵰的味道。
巨企裁人 一矢雙鵰
由於美股造好，港股開市跌唔到落去。下午本來偏軟的內地股市爆上，上證綜指收報3152點，升147點，漲幅近5%；深成指數報9890點，勁彈近600點，升6.45%，帶挈港股下晝升幅擴大，恒生指數一度升近六百點，收市升511點，收報21999點。中資股喺升市成為亮點，中移動(941) 升逾3％，內銀內險股亦升得靚。新華保險(1336) 勁升6.49%，報33.65元，是升幅最大國企指數成份股；太保(2601) 揚1.91%，報29.4元；平保(2318) 升1.97%，報38.85元；國壽(2628) 升3.72%，報27.85元。
內地金融圈大洗牌
寶信獲廣匯汽車提收購，加上摩根大通發表報告，調高寶信(1293) 及中升(881) 目標價，汽車經銷股獲炒上。寶信大升36.05%，造3.51元；中升控股炒高7.87%，報3.29元；正通汽車(1728) 急彈10.65%，報3.22元；大昌行(1828) 揚5.99%，報3.01元；和諧汽車(3836) 急升13.5%，報3.7元；美東汽車(1268) 升8.14%，報0.93元。
不過同美息比較，內地因素仲微妙，仲難捉摸。中信證券被查，就搞到佢逆市下跌，收市後傳出證監會助理主席張育軍被查，真係大件事。近排A股腳軟，除了限期清理配資及期指將結算外，盛傳管理層正清洗金融圈，一些炒股大鱷被追殺，一個個被查，那一個大鱷一中招，他們炒的整個系列多隻股票都燶晒，影響大市氣氛。濠賭股喺昨日大力反彈，但唔排除係跌得多彈番下。受內地政策影響不斷尋底，公司都要求變，金沙(1928) 就宣佈由王英偉出任行政總裁。今次由中國代替老外揸旗，加上王英偉熟悉國情，雖然唔能夠期望佢改變市場大氣候，至少喺應變方面會貼市啲。
波動市揀股要抵食
王英偉離巢，市場關心係佢領軍的新昌營造(404) 會點。新昌營造近期受圍標風波困擾，?家主將又過檔，如果喺半年前，市場就一定會傳佢賣盤，甚至借勢炒一轉。不過，時移勢易，佢市值有成47億，有番咁上下「卡士」，業務有內地房地產、建築等，瓣數都幾多，就算想賣都要鋪排下。
股市炒吓反彈，有中環茶友問，佢早排高位套咗現，?家如果想偷步買啲貨，有乜好揀呢？茶友話，佢嘅憂慮係除咗息口外，其他好似阿爺嘅政策仲未好清楚喎，所以都唔知買乜好？
有茶友聞言就搭訕，話可以考慮傳統抗衰退股，好似大家樂吖，佢近排跌咗落嚟，又有董事局成員入貨。大家樂成本之一係租金，呢排減租潮聽落對佢有利喎。
茶友講完，我話對買大家樂無意見，但係亂市買貨，最緊要防守性，其中一個辦法，係大件夾抵食，好似隻招商基金，股價不足帳面值四折，手頭最重要組合係招商銀行同系內信託，由於派息有六厘，咁就有一定防守性。
陸羽仁
金融High Tea 舊文
