中環在線：揚言中國現時需企業家打救
51歲馬雲80歲裸捐
■馬雲話等到自己80歲時，會好似畢菲特同蓋茨咁，將全副身家捐出去。 
語不驚人勢不休嘅阿里巴巴主席馬雲，臨近阿里上市一周年頻頻搶頭條，噚日再講自己對捐錢嘅睇法，話自己80
歲會將全副身家捐出去，分文不剩，即係今年51歲嘅馬雲，打算2044年捐身家，嘩，仲有29年！
反問股神40歲時為何不捐
馬雲承諾多多，華華都唔想向壞方向諗，但馬雲唔少口頭承諾仲排緊隊等住兌現，就好似今年初佢嘅10億元「香港青年企業家基金」，發佈超過半年，至今冇乜聲氣；而佢喺季績發佈會嘅回購、增持大計未有蹤影，就率先押股，之後又話係常用做法。
講番佢嘅80歲裸捐大計，馬雲就話，2010年有一次同股神畢菲特、微軟創辦人蓋茨會面，有討論過捐錢問題，馬雲聲稱當時自己反問畢菲特：「你40歲的時候為甚麼不捐？」之後就拍心口話「我要是80歲，我全都捐了，一分錢不剩。」
馬雲解釋，中國經濟整體唔夠平衡，要靠企業家出手打救中國，「企業家應該把錢花在投資，創造更多的就業，創造財富，這是第一責任。如果不把這個做好，我們今天這樣的年齡就把錢捐掉了，我認為這對中國沒有好處。」
查實馬雲早排講過類似嘅說話，話說天津爆炸之後，佢個私人微博俾網民洗版，要求曾經登上中國首富嘅佢捐錢賑災，疑似冇捐錢嘅馬雲當時回應話，「捐款是對的，不捐也是對」。
佢指，中國捐款要考慮埋「把錢交給誰」，覺得中國公益善慈缺乏基礎設施、法律體系、人才體系培養雲雲。總之兩個字講曬，唔捐！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
