一周三件：
信北水買信達
■信達今年5月創5.23元1年高位，現價2.9元。圖為集團總裁兼執行董事臧景範。 資料圖片
信達（1359）短短四個月，股價最多累跌50%過外，PB企喺歷史低位，識貨北水一路加倉。一於跟北水買信達，博轉反彈。
信達啱啱今年5月先創5.23元1年高位，跟住飛天
墮地，現價（2.9元）係1年底。信達除咗跟市跌，最主要原因，係市場有聲音話，信達高價買南商，激化拋售。但德銀最新8月尾報告就話，信達經呢期大插插，已經反映曬收購南商潛在憂慮。場內亦有分析指，信達收購南商，若果搞掂，集團將會係四大資產管理公司當中，唯一一間集齊7個金融全牌照，對日後做大做強，係勁有優勢。
落後大行目標一截
不妨再睇硬數據。信達2013年12月上市，上市以嚟嘅日均歷史平均PB，講緊1.4倍，最低見0.81倍。按信達上年尾NAV作準，往績PB都係得0.92倍，又若果以最新今年6月尾NAV計，信達只得0.83倍PB，係貼住歷史低位，比上市以嚟平均值，折讓咗40.7%！
信達5月6號高位期，北水持倉兩億股或1.72%，到7月8號港股大插當日，北水喺信達持倉2.37億股或2.03%。新鮮熱辣到上周五（18號），北水持倉上到2.83億股，或2.43%。睇到係，有醒目北水趁低兜信達，持倉兼係呢期高位。
由信達確認競投南商以嚟，大孖沙最新畀信達目標價，最高6蚊，平均亦講緊4.88元。以呢個水位計，信達係要升68%，到時，集團PB先啱啱好上到本身歷史平均值。個市時風時雨，話太進取，退一百步，以大孖沙最低3.77元目標價參考，信達亦講緊要升30%。
錢雋
細價股專家
本欄逢周一、三、五刊出
錢雋
一周三件 - 錢雋 舊文
