財經評論：
夠膽買樓嗎？
■新地新盤東環II第三次賣樓，推售不足130夥，比頭兩輪推出少了超過一半貨量。 資料圖片
近期每逢去親友聚會，通常都會被問到「呢排股市跌成咁，美國又話加息，樓市幾時跌？跌到幾多呀？」望住呢班親朋戚友，佢哋面口話曬畀人知，只要樓價跌，佢哋都會即刻想請小鳳姐出場唱返首《喜
氣洋洋》，高歌一句「熱烈地彈琴熱烈地唱」。
不過，小記可以肯定，呢班親友，是越跌越唔敢買的一群。
綜合代理朋友分享做生意經歷，多年以來當一個二手樓買家如果見業主減價一至兩成，心態大致可以分為兩種。第一種，即時會接貨，更可能會自己「暗爽」買到平嘢，但這類勇者其實不太多；較多的一種，就會再想等多一陣，減夠三至四成先再算。豈料，又「咁好彩」畀佢等到，樓價真的跌夠四成了，但到嗰一刻，幾乎送畀佢都唔敢接貨，因為樓價跌夠四成，可以推斷到，經濟氣氛已經差到不得了，小市民甚至連自己份工都唔多穩陣，人人爭住沽，又點可能夠膽出手入貨呢？去到嗰一刻，褲頭就算有多餘錢，都寧願自己「袋住先」啦！
市場承接力存疑
回歸現今的樓市氣氛，可以見到的是，近期一手樓已經好難再有即日沽清的畫面，但撻訂個案幾乎日日有，就連新地（016）的東環II第三次賣樓，都只是推售不足130夥，比頭兩輪推出少了超過一半貨量。新地美其名解釋，因為首輪及次輪各賣逾300夥單位，銷售時間較長，為了方便買家，期望可於黃昏前完成銷售程序，實情係發展商自己都擔心不能做到即日沽清的場面，索性賣少一百幾十件，延續一個「好好睇睇」的沽清畫面。
當下龍頭發展商都開始質疑市場承接力，閣下又真的夠勇氣，在這個通街都是負面消息充斥，隨手都可以找到幾十個淡友行出來「唱衰」的市場，出手入市嗎？近期哭股喪的人多，相信不久的將來，哭樓喪的人都唔會少。
記者︰黃嘉銘
財經評論 舊文
