中環在線：
搵耶倫過橋 財爺暗戰CY？
■昨日曾俊華（左）上載與耶倫的合照，不少網民畀like。 曾俊華fb圖片
如果要講最識得利用facebook（fb）建立形象嘅政界名人，財爺曾俊華肯定數一數二。早排佢話政府有必要時會調整樓市政策，CY轉頭就跳出嚟話政府唔會減辣，搞到財爺好似
講大咗咁。財爺噚日就喺fb上載跟美國聯儲局主席耶倫嘅合照，又透過網誌解釋，自己每次提到調整樓市措施，都係做「人肉錄音機」，一招四兩撥千斤幫自己解圍。
■梁振英 不改口風 怕被過份解讀
市場最近談論得最多，就係美國幾時加息，財爺噚日大約中午上載與耶倫嘅合照，即刻有好多網民畀like，唔少留言問財爺有冇問耶倫幾時加息。
財爺就順便喺自己網誌提到，正在秘魯首都利馬，以中國代表團成員身份出席國際貨幣基金組織和世界銀行年會，喺當地有機會與耶倫會面。
佢話，當然把握機會，問耶倫有關美國嘅加息步伐，但知道對方一定唔會答，情況有啲似記者朋友不時問佢，幾時會調整針對樓市措施一樣，佢咁多年都只能用「標準答案」，做「人肉錄音機」，否則一旦佢改咗口風，隨時被市場過份解讀，甚至造成不必要嘅震盪。
佢呢番說話，似係衝住CY去講，強調自己冇講大到，都係講阿媽係女人之類，只係有人過份解讀咗。唔知係咪避免又有人過份解讀，好鍾意玩selfie嘅財爺，今次只係正正經經同耶倫合照。
咁都啱嘅，財爺今年中喺北京出席亞投行簽署儀式，跟國家主席習近平握一握手，就即刻人氣急升，成為下屆特首熱門人選，如果好friend咁同耶倫玩自拍，令人唔開心就唔好喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
