智取大市：國泰君安成新強勢股
唔少二、三線股突破咗7至8月期間形成嘅平台阻力，呢類股份噚日特別獲得資金追捧，噚日亦有一個唔錯嘅現象，就係呢類轉強二、三線股表現硬淨，科網股同券商股喺恒指即市回吐期間，升幅冇收窄幾多，有貨喺手的話，可考慮斬邊留邊，冇貨喺手的話，無謂急追，下轉請早。喺港
股調整期間，可以留意二、三線嘅硬淨程度，表現越硬淨，後市越值得吸納。
從技術走勢睇，恒指又的確有回吐嘅壓力。短短8個交易日，恒指升幅達10.5%，同港股大時代當中，恒指最勁嗰8日升幅14.4%相比，近期指數升幅嘅威力，原來及得上大時代嘅四分之三，以短線反彈幅度嚟講，開始有飽滯嘅感覺。
另外，指數升至7月8日大跌市低位22836點嘅阻力，連續兩日出現即市調整壓力；同時恒指9小時RSI由10月初到而家，做完雙頂背馳再做三頂背馳，MACD亦形成熊差，動力正在減慢，指數短線調整實在難免。
不過，踏入10月中，大市再直線急插嘅機會已經減低，第四季至出年年初，相信有chok冇跌市。
事實上，目前港股同2011年10至11月感覺極為相似，如果真係跟足2011年10至11月劇本，大市經歷過幾次急升急插，但又破唔到底，大家就開始相信大市短線跌唔落，原來chok市只係一場虛驚，信心逐步回穩，開始有信心買貨，然後年尾直至出年年頭，就會出現一輪升勢。
受惠北水南下
晉佳認為，10月下半月同11月上半月期間，出現恐慌性拋售機會偏低，但理論上未來一個月內會出現調整，到時就有撈貨機會，起碼11月下旬至12月全月都係安全期，基金掟貨誘因甚低，相信會係港股偏強嘅時份，出年1月再且戰且走。
股份方面，國泰君安（1788）近日走勢出奇地強，喺上個星期一已經突破平台阻力，算係最早轉強嘅二、三線股，後市自然有條件強落去。
喺滬港通之前，國泰君安係內地資金流去美股市場嘅熱門渠道，賺大陸佬炒美股嘅孖展利息同買賣傭金都已經賺到笑。
內地A股早幾個月搞禁沽空、禁沽貨，搞出個大頭佛，A股立立亂，炒開A股有錢都可能有興趣移民去港股度玩，上市嘅國泰君安，係整個集團嘅香港分部，自然係順理成章成為內地大戶搬錢南下炒港股嘅熱門途徑，唔排除近期國泰君安股價特別強，係因為多咗呢條水，港股大時代之後嘅盈利表現，相信比起港股大時代之前更強。
升浪當中唔似一步到位，所以大家不妨留意國泰君安喺港股調整期間嘅表現，只要佢股價硬淨，就不妨喺未來一個月內吼位吸納。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
