中環在線：趙國雄囝囝三年三度升職
趙朗掌里昂香港房產投資
■Zing!暫時租出逾七成樓面。 李潤芳攝
所謂虎父無犬子，長實地產（1113）樓神趙國雄認真飲得杯落，佢28歲嘅阿仔趙朗（Ronald），加入里昂證券5年左右，不斷升職，早排又升，近3年每年升一次，最新職銜係里昂亞太恒富
房地產基金香港區主管，睇曬成個香港地區嘅房地產投資項目。
曾拆售羅素街8號大賺14億
Ronald喺2010年加入里昂證券，初時做分析員，去到2013年升為恒富房產基金投資經理，當年主理拆售銅鑼灣銀座式商廈羅素街8號。拆售成績理想，全幢賣曬，幫基金勁賺超過14億元，成為市場一時佳話，佢舊年因而獲升為投資董事。
Ronald今年主要係負責銅鑼灣耀華街38號「Zing!」嘅租務，項目租得唔錯，所以佢近月更上一層樓，獲擢升為香港區主管。
Ronald好謙咁話，升職都係多得老闆賞識，佢認為成個房地產基金係一個團隊運作，唔係佢自己一個人嘅功勞。至於人工加幾多？年薪係咪過千萬？佢笑住話，唔講呢啲。
Zing!暫時租出超過七成樓面，呎租50至60元（同類銀座式商廈現時呎租介乎40至60元），主要都係租畀餐廳與美容商戶。項目30樓頂層單位，約1,750方呎，更以12萬元租畀一間特色餐廳，呎租約68.6元，屬大廈呎租新高。
𠵱家大家成日話零售市道差，趙朗都有計搵到租戶，呎租唔太差，難怪年年升職喇。
■趙國雄 樓神舊年薪酬達三千萬
趙朗年年升職，人工肯定相當唔錯，唔知追唔追得上爸爸趙國雄呢？趙國雄有長實地產（1113）「樓神」之稱，年年幫超人度橋賣樓，有時甚至要扮鬼扮馬搶鏡，佢舊年加薪5%，總年薪有3,012萬元，其中包括1,800萬元花紅。
而喺本港地產商入面，江湖地位拍得住趙國雄嘅另一位樓神，應該係新鴻基地產（016）副董事總經理雷霆，新地最新年報披露，雷霆舊年加薪一成，總年薪2,119萬元，當中一半係花紅。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
