重陽劫
2015年10月22日
香港昨日重陽節放假，上日美股微跌，本來預佢無乜事發生，點知內地重陽節股市大插，上證指數連續跌破3400點及3300點兩個整數關口，收市略反彈，收報3320點，仍插3.1%。
內地除銀行、保險等金融板塊好少少之外，題材股全線急回，創業板暴跌近7%，整體市場成交量急劇放大，A股兩市
成交額再次突破萬億。
A股重現千股跌停
國慶之後內地股市反彈走勢良好，但昨日再出現罕見的「千股跌停」現象，內地證券界人士大喊重陽節變成「重陽劫」。
內地跌市似乎又無乜特別理由，好多人用技術因素去解釋，話上證指數接近3500點這個的關鍵點，A股未能上破就大跌，後市隱現深秋寒意。
個市一好番，內地叫做「融資」的孖展借貸即上升，令人擔心阿爺怕融資太高要壓一壓個市。最新數據顯示，兩市融資餘額已連續七個交易日淨流入，再次逼近萬億元。單日融資買入規模從300億元低谷恢復到逾1000億元水平。內地股民係「金魚記憶」，傷口未好都已經唔記得痛。
不過內地證券界未認為大市重現股災，認為股市只是回調，不少建議候低吸納。例如中金公司就建議，在市場情緒恢復階段，優質成長股將有機會，可關注傳媒互聯網、醫藥、軍工、環保與新能源等行業中的有質量個股；十三五規劃將是近期熱點，繼續關注相關的國企改革、人口政策調整、中國製造2025、軍民融合、深化對外開放等主題。
睇番九月份，全球股市關注美國會唔會加息，搞出跌市大合奏，之後美國延後加息，十月基本上都係玩反彈，但彈到咁上下，個市唔易搵理由大力炒上，A股重陽大跌，多少係呢個背景下誘發。呢兩日，美國財政部發表最近一期的《國際經濟和匯率政策報告》，唔再指控中國操控匯率，承認考慮到中國匯改及經濟增速放緩的跡象，市場預計短期人民幣兌美元將進一步貶值。
美國財政部報告亦提到，在中國八月匯改之後，外流的規模可能達到2000億美元，話當中唔少資金泊在香港。
以美國佬估2000億美元流出中國呢個數，唔係小數目，部份流入香港，亦成為推動港股其後大幅反彈的水源。
至於中國股市近期雖然好轉，但第三季GDP「破七」，資金外流加經濟唔好，令市場憧憬中央將出招力谷經濟，包括匯豐、摩根大通、高盛、巴林、恒生等多家外資大行都預期內地會有減息降準。
降準預期再升溫
在對阿爺放水預期升溫下，外資唔單止講，亦有所動作。據港交所披露，最近十個交易日的權益變動事項1067項，較上期增加194項，反映市場交投活躍度繼續回暖。
其中，摩通表現最為積極，近期大範圍增持建材、醫藥、電訊、房地產等板塊股票，其中包括1174萬股中國電信(728) 平價4.088元，逾330萬股上海醫藥(2607) 。同樣咁積極入市嘅有貝萊德(BlackRock)，佢增持的股票與摩通好唔同，主要買入中資證券商、核電、汽車等板塊股票，反映大行對各類板塊的睇法有好大分歧。
由大行的動作睇，由於內地係匯市同產業結構有好多動作，佢哋依家唔會單邊睇好或睇淡，在炒個別之際，當個市升時佢哋可能就會沽吓，跌得太多時就會買吓博阿爺出招救市。重陽劫可能觸發一輪試底都唔出奇，但跌得深啲，我估有人又會出嚟買吓。
陸羽仁
金融High Tea 舊文
