中環在線：滙控企業傳訊部一拆二
對外事務收歸範智廉管理
滙控（005）近年成日改組，最新消息係，跟傳媒關係密切嘅企業傳訊部重組。據聞上月底，內部已發出通知，主要係將部門一分為二，分為對外與對內兩個部份，對外部門由以往行政總裁歐智華負責，轉咗畀主席範智廉。
重組後，企業傳訊部會一拆二
，其中主管傳媒兼NGO關係嘅新部門，用番多年前集團叫開嘅舊名──公共事務部（Public Affairs）。最得意係，日後統領呢個部門嘅環球公共事務主管，直接向主席範智廉滙報，唔同𠵱家向行政總裁歐智華負責。
高沛賢睇埋僱員通訊部
另一分拆出嚟嘅部門，叫僱員意見及通訊部（Employee Insight And Communications），負責對內員工溝通，歸由年初先升任集團環球人力資源主管、兼歐智華親密戰友高沛賢（Pierre Goad）領軍。
Pierre原來兩個月前已再上層樓，晉身為12位集團常務總監之一，與滙豐銀行副主席兼行政總裁王冬勝、環球炒房阿頭安思明等同級。
曾任職《亞洲華爾街日報》嘅Pierre，財經記者出身，做到歐洲最大銀行人事部阿頭，統領集團全球25萬員工嘅人事佈局，仲入埋滙控最高行政管理聖地，認真巴閉。
講開Pierre，9月底先同佢在港主持town hall解畫、執掌環球企業傳訊主管唔夠1年嘅Mederd Schoenmaeckers，做埋10月就拜拜嘞，集團亦已搵到接替人。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
