智取大市：熊市反彈期望不大
小弟最近觀察恒指嘅技術走勢，對分析後市有所發現，內容係有點兒複雜，要勞煩大家一邊觀圖一邊睇文才能消化，欠耐性者直接跳去結論好了。
長線好大機會續跌
30分鐘圖：噚日30分鐘14 RSI曾經升到去86，超買情況罕有。由恒指今年4月見頂至今，共出現3次恒指30
分鐘嘅14 RSI升到80，但3次都係即日見頂，其後短線跌幅至少1,000點。
至於今次能否逃過厄運？根據往績，只要恒指未來兩日橫行或續升，去消化超買，就顯示恒指今次反彈浪比起跌市任何一次反彈浪為強，破位有希望。如果恒指今日已經顯著下跌，就已經代表短線升浪終結，同之前嘅彈散格冇分別，好快再試低位。
日線圖：恒指最近喺20500點至22000點之間，形成小雙底，頸線喺22424點，同時非常接近保歷加通道上軸，22000點同時係恒指過往5年關鍵位，經常成為阻力或支持，因此可視為重大阻力。不過，過去三次挑戰22000點以上水平，成交額一次低過一次，向上突破需要有成交配合。
30分鐘同日線圖反映恒指短線有阻力，周線圖同月線圖就能分析方向。
周線圖：近5年恒指周線圖經常出現zig zag（Z形）走勢，由跌轉升過程中嘅zig zag階段，為期至少10周。如果zig zag唔夠10周就出現方向，方向就會極大機會係同向，即係跌完再跌。
目前恒指今個星期進入第7周zig zag。如果重複往績，樂觀版本係喺20500至22250點之間徘徊至少一個月，先至有條件向上突破，悲觀版本係從現水平即時急跌。論形勢，徘徊多一個月再出現反彈機會較高。
月線圖：不過，睇埋月線圖，就知道港股都只係有反彈、冇升幅，因為恒指喺9月首次由上而下跌破月線保歷加通道下軸，絕非佳兆。
根據過去25年數據，未計今次，恒指共有4次由上而下跌破月線圖保歷加通道下軸，4次都未見底，其中2008同2011年就係直插冇水花嘅快速版本，恒指急挫多大約1個月就見底，但單月跌勢會係整個長線跌浪最急勁。
至於1997年10月同2001年3月跌破保歷加通道下軸後，恒指只出現三幾個月輕微反彈，首個反彈月份，升幅非常有限。以往績計，大跌市後的首支陽燭，最叻亦只係上一月高位水平，換言之，今個月收市價難以高於9月高位22228點。
要留意，技術圖表越長線越準。
結論：港股長線好大機會繼續跌，10月至12月難大跌，升幅亦唔慌多，未來幾日明顯突破22000點亦比較困難，長線定短線去買跟大市上落嘅股份，勝算都唔高。真係要買，寧小注吼細股，有作戰意欲者可留意9月剛配股、股價跌唔落嘅e-Kong（524）。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
