市底轉強 回吐難勁插
2015年10月15日
中國版QE出籠，中港股市有點反高潮，連續兩日出現回吐，上證指數跌近1%收市。雖然個市調整消化，但疾風知勁草，個市跌吓反而見到佢承接力唔差噃。
內地擴大銀行質押資產，即係容許銀行以債權抵押向央行借錢，有人形容係驚天重招，有人半信半疑，認為只是中央銀行完善政策工具的措
施。兩個講法邊個啱，經過一輪理解後，陸羽仁聽聞都係以重手放水呢個說法至真。
威力被指等同十次降準
內地專家估計，透過增加可以抵押的金融工具去增加市場資金，威力等如十次降準。呢個做法不同減低存款準備金率或減息，除了可以大量提高可以借出的資金數量之外，可以校準方向，大力咁催谷資金落某些銀行，可以較集中支持民企、微小企業和農業等政策想支持的企業。
喺擴大質押消息公佈後，內地股市借勢爆上後唞氣中。不過睇番過去一段時間，我會覺得阿爺這個七萬億中國量寬政策，已經開始為個市築起個底，大力浮起咗下面的承托力量，令人見到回吐時，都不怕股市驚天下插。
上個星期內地借黃金周後復市爆上，到周一再借七萬億量寬抽高，呢兩日向下回調，港股都跟住消化，但調整幅度唔算好大，唔似得之前急插之後彈上，彈完之後插得再低啲，依家個市回吐時有少少浮浮沉沉的感覺，但係低位就見到有力托住，所以以回吐形態睇，個市底強咗。
對於內地以QE形式救市，部份分析家抱質疑態度，認為係泡沫破裂，政府就搞出更大的泡沫的救市。呢種質疑係金融海嘯爆發後就已經存在，認為聯儲局的量寬，只係提供咗廉價資金，讓公司發債集資去回購股份，推升每股盈利，推高咗資產價格。到歐債危機又到歐洲央行重複相同做法，依家中國面臨滑坡，都加入埋灌水浮球的遊戲。
經濟長線分析和財經分析不一樣，財經分析看到時段更短一點，從美歐例子，大量銀紙湧入金融體系，會令資產價格得到承托，如果同樣經濟在內地規劃下的經濟同樣應驗，內地資產就會俾大水浮住，短期唔會咁易沉落去，三五年後經濟爆唔爆係後話。在此假設下，內地股市好轉，港股即使是維持大型上落市，見回吐就係買股機會。
港股昨日調整，理由之一係內地經濟數據弱，上月通脹數據遜預期，PPI更連續43個月下跌，其實中央連續出手大力救市，應該係預知數據肉酸，所以PPI唔靚仔，只係調整的藉口，睇番恒指午後港股一度再挫逾兩百點，尾市回穩跌160點收市，恒指收報22439點，行情叫做穩定，市底睇落強咗；國指收報10334點，跌103點，大市成交縮減至723億元。
環保相關股有得炒
由於中央政策再成市場焦點，所以買盤都係跟住國策轉。有國家能源局官員表示，十三五規劃將會擴大內地的光伏發電規模化利用，協鑫新能源(451) 、興業太陽能(750) 、順風清潔能源(1165) 都升超過8%。環保股龍源電力(916) 升2%，報8.64元，是表現最醒國指成份股；京能清潔(579) 彈10.2%，金風科技(2208) 彈9%。
習主席去美國訪問，其中一個最惹外界關注係同奧巴馬達成減排共識。按照中美同意減排的大方向，中國必須全力加強清潔能源，否則不可能達標，故此未來相關政策會陸續出台，有質素同派息啲環保股好似金風咁搶先湧上來，如果想穩陣又想搭呢個概念的順風車，可以等呢啲優質股回調吸納，若然想博大霧投機吓，就可以買細細粒嘅電池股或電動車設備股。
陸羽仁
金融High Tea 舊文
