魚樂無窮：8倍PE盈喜股
■嘉利國際發盈喜，刺激股價爆升三成；圖為集團主席何焯輝。 資料圖片
老牌工業股嘉利國際（1050）發盈喜，刺激股價爆升三成，但估值依然平到笑，如果從米芝蓮品評餐廳角度出發，絕對係三星級之選！嘉利受惠工業業務營業額及溢利增加，預計中期盈利將升五成，去年同期賺3
,863萬，預示今年中期賺5,795萬，相當於去年度盈利77%，墊底利錢豐厚！保守估計全年賺1億，年度化市盈率僅8倍，呢份前菜滲出陣陣燒鵝味道，先摘第一粒星。
嘉利主打三瓣業務︰1.產銷五金塑膠產品如伺服器電腦外殼等；2.電子代工如磁帶解碼器、收銀機系統；3.婚慶及餐飲業。前兩者受惠生產自動化，效率極速提升，成為增長動力。後者雖仍蝕錢，但已逐步收窄，錄得盈利只係時間問題，屆時三頭馬車全速前進，不得了！4月與主席何焯輝旗下公司訂立協議，合作發展東莞鳳崗鎮地皮，嘉利將投資1.24億。何解突然染指房地產？原來嘉利同區有幅廠地，已獲批改作商住用途，面積逾6萬平方米，一旦起動，爆發力驚人！咁多款主菜各具特色，再摘一粒星。
派息當然係頂級甜品，現價息率超過8厘，還未計今年增長，第三粒星手到拿來。噚日成交量創兩年新高，絕對唔係尋常散戶掃貨，首站目標先睇NAV價0.495元，屆時市盈率只不過10倍，仲有大把水位。
唐牛
https://www.facebook.com/tongcow88
唐牛
魚樂無窮 - 唐牛 舊文
