智取大市：2015年十大財經怪事
要形容2015年嘅港股，最貼切嘅字眼係「估你唔到」。趁年尾大市冇方向，就重溫十大財經怪事，去remind大家，港股市場有幾咁怪雞，你早一步將世事看透，2016年先能夠喺股海之中捉幾條魚嚟食嚇。
第一怪事，港股超短癮大時代。3月底至4月初，藍籌股爆升
唔夠兩個星期就收工，大市6月正式game over，堪稱最短大牛市。怪事告訴大家，等候入市機會唔使急，但機會出現時，就最緊要快。如果閣下4月遲咗一個星期入市買藍籌？就由贏家變輸家，真係離地一日都不行。
第二怪事，6、7月嘅A股救市行動。中證監禁大手沽空、禁大股東及管理層減持半年、加埋人行雙降，一樣救唔番A股。中央手影仲難捉過Stephen Curry，買股票更不能盲信中央。
第三怪事，金管局入市變壞消息。人民幣轉弱令離岸人民幣出現拆倉潮，迫使金管局入市反而對港股不利。原來呢個世界冇一個消息，係可以永恒利好股市的，股票咁易炒，就冇窮人吧。
第四怪事，人民幣貶值，愛國商人喺報章賣廣告嗌救命，期望中央打救。你睇完唔好笑呀，中央行事以黨派利益為先，股東利益居次，絕非好事。黨派鬥爭刀光劍影之下，隨時殺錯股民。
第五怪事，滬港通run足一年，A、H股差價完全冇收窄。H股唯一相對A股溢價嘅股份叫做安徽海螺（914），至於折讓最大嗰隻叫做洛陽玻璃（1108），H股較A股折讓87.6%，證明大陸錢絕冇興趣流出海外，所謂人民幣國際化嘅國際影響力肯定冇想像般大，受累股份？第一時間諗到中銀香港（2388）。
殼股成為最強港股
第六怪事，殼股成為最強港股。年底港股死狗，殼股仍然有炒作，君不見耀科國際（143）賣股權予中信國安，股價連續兩日爆升？換言之，冇實業嘅股票，比起有實業嘅股票，更有價值。媽，我好亂呀！
第七怪事，漢能（566）大股東李河君成為內地首富。佢嘅身家一度直逼facebook朱克伯格，炒殼股有如此成就，證明殼股是當頭起。基本分析型投資者，明年惟有繼續心理不平衡。
第八怪事，沽空機構廢掉武功。沽空機構講邏輯、講造假證據，但唱衰報告開始冇人想理，鬼咩，中資股，係政治勢力大於一切。
第九怪事，郭廣昌被調查。喺習派、江派之間的紛爭，有心人要搵一個最有代表性的商人去打壓，郭廣昌的確係不二之選，呢件怪事反映，黨派鬥爭對股市嘅影響遲早浮上水面。
第十怪事，高鐵超支至少194億元，其餘超支額要港鐵（066）硬食。這正正係「你不理政治，政治也會找上你」嘅一大證明，如果好似自認好叻嗰位，對政治冷感，買股票容乜易輸身家。所以，買港股增加些少政治智慧，或許幫你趨吉避凶，好過走去搵風水師。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
來源 source: http://hk.apple.nextmedia.com
