金手指 - 孫柏文 2015年12月22日
金手指：
不問價追CEC
■《競爭法》條例下，如759阿信屋成功淘汰對手，毛利率都有望倍升。 資料圖片
噚日同個基金內部分析員傾偈，講到上周有兩項政策落實，雖然市場冇反應，但就衍生大機會。
係咩政策？就係花旗國加息同香港實行《競爭法》。對此反射式反應係：「高負債同喺香港玩割喉式吸客嘅公司一定死！」
而最有呢兩個特質嘅香港上市公司，就一定係經營759阿信屋嘅CEC（759）。不過，點解政策落實後，CEC股價不但冇跌，仲連開三支陽燭？而我仲居然叫大家「不問價追」呢？
毛利率有望倍增
CEC其實係一隻好多人睇實嘅股票，不過近半年股價冇起色，就係大家睇唔到CEC有意推高佢哋極低嘅毛利率。講到零食，759已經係數一數二，而高轉數零售最講規模。因最核心，就係變成謀利消費者聯盟，向供應商㩒價。
𠵱家759門市已達200間之多，點解咁大，都冇霸權之風去擴大毛利率？原因就係當佢哋成功爆出之後，一間又一間乜乜360、直之一叮等相繼出現。對手能出現嘅最主要原因，就係因借錢太易。
𠵱家一加息，所有財務公司都追數，呢啲規模只得幾十間嘅公司冇得死頂。而上周CEC主席林偉駿被問到《競爭法》對佢哋有乜影響時，佢答：「好難再減價。」其實講緊全行都唔可以再割喉。
如759議價能力最強，成本最低，對手冇可能收得低過佢時，759就會好快淘汰對手。原來之前兩年集團唔加價擴毛利率，就係要穩定市場佔有率，等今日收成！
以759現時毛利率得幾個百分點計，唔使講舖租未來會大跌、美元繼續強勢，淨係佢嗰班燒銀紙嘅對手未來瓜柴，759嘅毛利率都有望倍升。聽聞𠵱家開始有大基金掃貨，你懂的，仲唔不問價追CEC？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
