魚樂無窮：低調的聖誕禮物
■平安夜前夕，港股成交500億，指數挾高逾200點。 李潤芳攝
平安夜前夕，港股完美演繹貨疏價必揚的道理，成交500億，指數挾高逾200點，情況就好似扯大纜咁，其中一邊發力，另一邊懶懶閒，要分出勝負話都冇咁易，只要嚟緊幾日中美股市生性，其實仲有上升空間。睇
幾多？九連跌前約22500水平吧。
嘜價手影不絕，最新輪到工業股。建滔化工（148）漲半成，嘉瑞國際（822）搶高14%，有盈喜護身嘅飛達（1100），更爆升24%。同屬工業股一族嘅富士高（927），低調到冇人知，換句話說，一旦起動，同樣可以升到你唔信。
睇睇富士高基本因素，你肯定會唔開胃︰中期收入下跌22%，毛利跌12%，虧損更擴大至1,140萬銀，主要因為市場整合及競爭激烈，影響其耳機產品接單情況。正因為咁，股價由高位瀉逾七成，最新於三年低位徘徊，殘到冇朋友。不過，投資價值卻因此浮現︰手頭現金4.5億，扣除2,200萬負債，淨現金達4.3億，比起最新市值4.1億仲要多，即係你出4.1元買嘢，竟然有4.3元收番，有冇搞錯！加少少想像力，富士高業務簡單，如果大股東意興闌珊賣盤，可謂易如反掌，用殼價秤估值，富士高現價四折大平賣！幾時可重回合理值？噚日股價蠢動，有開波味道，今日半日市速戰速決，話唔定係大大份聖誕禮物！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
