政經密碼 - 周顯
市升股跌的半新股
2016年01月25日
港股上周一至四大跌，半新股股價反升。(資料圖片)
在上周一至四，股市大跌，但多隻半新股喪炒，市場人士分析說，這是因股市太差，新股沒有散戶入飛，莊家唯有自己圍乾曬，街度完全無貨，咁咪可在大跌市，照樣日日升囉。上周五股市大升538
點，但幾隻半新股居然不升反跌，市場人士(其實這個市場人士是我自己)解釋是：「唓，前幾日無散戶入市，咪日日升，今日散戶入市了，仲唔快快派貨咩！」
查實，散戶入市，究竟莊家會不會派貨，也是存乎一心，不能一概而論。如看好後市，梗係同散戶一起搶貨，有咁高炒咁高先講，食一大茶飯啦。但當熊市時，難得有魚入籠，就可能泥鯭籠，有入無出，食咗先至講啦。
話說其中有一隻新股，梅偉琛看中，入了頂頭槌飛，中了百幾萬元，在上市當天，股價升兩成後成功沽出。誰知這股票在跟著的日子，一共上升了幾倍，梅偉琛眼看幾百萬元利潤，從眼前流失了，雖然也算贏了幾十萬元，但也贏少當輸，心裏非常火滾。
我說：「這些新股，其實刨到都唔使恨，因為你根本睇不通其中的走勢，也睇不通其中的財技，唯一可看的資訊，是圍得夠不夠乾，所以就算升十倍，你也不敢去揸到底，因為你不知它何時才gap down派貨。你賺兩成，已經好叻仔了。」
過了兩日，和美女股神Michelle BB和幾個「股市苦主」在銅鑼灣勝博殿吃午飯，Michelle BB大呻沒有買某隻半新股，我說：「你就算真的買了，能買到多少？一格只有一萬幾千股，就算掃上幾檔，數埋只有幾萬股，贏埋先至幾皮嘢，都唔夠你個車轆。」
美女股神同意：「係呀，我架馬莎俾人講價，應承咗，都反口要減價6萬元，我架係最高級版本，當然不肯賣給他！」
稍為認識美女股神的人們，一定奇怪：她的名車明明是愛士頓馬田，為甚麼會忽然變了馬莎拉蒂呢？答案是：她其實買了馬丁，卻沒有賣掉原來的馬莎，還整了十幾萬元，跟著施施然地去放售。大家知喇，有錢人賣車，因為不等現金用，所以永遠掛高幾格，因此永世賣不成。
話時話，她的車已放售好幾個月，我說：「雖然你唔等錢使，仲想買多架Alphard同請司機，但如果我是你，睇見架舊嘢，也覺得煩，難得有人出價，快啲賣出去，無眼屎乾淨盲！」
作者為小說作家、報社主筆、股票投資者，吃喝活樂的專家。
回首頁
政經密碼 - 周顯 舊文
來源 source: http://www.am730.com.hk
