停「熔」維穩
2016年01月08日
中港股市繼續下挫，而且搞到環球股市都發燒，內地「燒Fuse」跌停收市後，港股全日大跌後，歐美股市無運行，連美股杜指期貨也急瀉超過三百點，杜指期貨最新造16470點，大跌368點或2.19%；標普500期貨最新造1941點，插44點或2.23%；納斯
達克期貨最新造4326點，瀉120點或2.7%，歐洲股市亦唔靚仔。
中證監煞停熔斷機制
昨早人仔開市一度急插，之後有傳人行入市，喺匯價陰影下，內地A股繼續出現鎔斷，開市無耐就插到停市，唞唞復市又跌過，好快就跌到全日停市。新一年開局僅僅四日，內地股市已經先後兩次觸發熔斷機制，股民當堂個心都離一離，搞到中證監漏夜公佈，今天(周五)起暫停實施指數熔斷機制，以維護市場穩定。中證監話，熔斷機制是全新制度，在中國沒有經驗，市場適應也要有過程，需要不斷完善。
強美元效應大殺三方
全球股市陷入中國震盪中，由於內地匯股齊跌，搞到歐美股市都弱弱哋，美股前晚又插。上年底美國聯儲局加息，跟住掀起全球資金大執位，熱錢由新興市場流出，呢個亦係我近幾個月成日話要提防的強美元效應。
內地股匯繼續雙插，內地停止交易，港股跌近五百點後再開始浮浮沉沉，但已經插穿去年九月份低位。個市咁插法，有人驚到想沽貨，但無貨在手者，又手痕痕想入貨。究竟係應該沽貨定入貨呢？
要回答呢個問題，一個好重要關鍵係美國利息走向，今年金融市場一個最需要留意嘅風險，係美息加息力度，會唔會比預期強勁。美國去季加息四分一厘，暗示咗今年會每季加息，大約加兩至三次，之後再睇經濟表現。美國加息表示過去資金氾濫的環境正式逆轉。美國資金供應由量寬的放水，變成等加息的停水，到加息的收水三部曲。若然美國經濟保持強健，收水力度持續，咁因為水浸發大吹起的泡沫就會收縮爆破，如果用呢個角度去睇，個市仲未係見底時候。
不過，唔能夠排除嘅係，如果資產價格持續下跌，影響到實體表現，嚇驚聯儲局一班大員，拖慢或者叫停加息步伐，咁個市就可以有一輪反彈。從呢個角度睇，A股跌、港股跌，最驚就係美股唔跌，因為美股唔跌，美國持續加息機會就大，咁新興市場退潮就持續。不過，聯儲局對利息的取態唔係咁易可以捉路，而且可以變得好快，所以買唔買股，仲要睇埋自己投資狀況。
港股跌破去年低位，沽售力度應該慢慢減弱，再跌就有反彈條件，因為通常個市跌完大家會覺得股價抵買，當佢彈完無力再落，睇法先會唔同。
以港交所(388) 為例，好多人喺280元仲叫人買，家插穿200元自然係大平賣啦，但如果睇番佢去年低位120元起步，就唔係咁平喎。所以用短線去睇，股價開始跌近至可以博反彈的水平，但中線去睇，其實仲可以平啲，而去唔去火中取栗，就要睇各人袋中有多少本錢啦。
大戶喺港股撳錢
至於昨日市況，港股變成提款機遭大戶撳錢，恒指全日插647點，已連挫四日累瀉1581點或7.21%。恒指收報20333點，全日下挫647點；國指收報8753點，下滑383點，成交金額近1072億元。
藍籌股近乎全軍覆沒。匯控(005) 挫3.3%，報57.3元；騰訊(700) 挫4%，報140.2元，兩股已合力砌低恒指154點。首日掛牌的新股表現標青，年年卡(3773) 收報1.27元，較上市價1元飆升27%。匯控急插近兩元，去到近年低位，息率去到6.77厘，理論上佢人民幣資產唔多，家水平再跌，買嚟擺喺度收息都有數計。
陸羽仁
金融High Tea 舊文
來源 source: http://hdfin.stheadline.com
