中環在線：梁高美懿無意出選立會
弄孫為樂 拒撼吳亮星
■被問到有冇興趣做銀行界議員，梁太不停以兩個寶貝孫做擋箭牌。
今年立法會選舉，銀行界人士議論紛紛，究竟嗰位令大家認識「洗頭艇」嘅銀行界議員吳亮星幾時Out？又有邊位德高望重嘅賓架可以做呢？創銀（1111）副主席梁高美懿噚日聽見就
笑笑口話：「不如我去選？」不過佢隨即話：「講嚇笑啫，我有兩個孫，唔得閒呀。」
於銀行界人脈廣
63歲嘅梁太2012年離開恒生（011）退休，兩年後重出江湖，掌管創銀。噚日佢同一班傳媒飯敍，講到選立法會議員，其實以佢嘅人脈與地位，肯選嘅話一定高票當選，可惜佢就冇乜興趣，不停以兩個寶貝孫做擋箭牌，話「我有兩個孫要湊。」聞說佢兩粒孫一個兩歲，一個出世冇耐，佢想弄孫為樂都好合理。
而講起港大校務委員會爆發嘅爭議，作為港大校委會成員之一嘅梁太，就認真有嘢想呻，例如部份學生指委員會入面有好多局外人，個別係暗示已離校多年嘅佢，佢就有啲激氣，澄清佢係真．港大人，「I feel a very part of HKU！」
澄清係真．港大人
梁太早於1978年喺港大經濟學學士畢業，佢話，離開母校之後，有加入舊生會、參加師友計劃，閒時仲會返學校講talk，「我哋參加，係冇個人利益」。
佢唔想就個別人士置評，不過就提到讀書時候，學生活動其實都唔少，有罷課、示威，但一啲都唔暴力。佢亦曾為釣魚台事件而罷課（保釣烈士陳毓祥係佢同學），「其實罷課係自己嘅，但希望你發表意見時候，唔可以傷害人」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
