阿爺出招托內銀
2016年02月17日
內地春節假期完結，在官方積極護盤下，內地A股猴年似模似樣，昨日公佈的貸款數據理想，再推動滬深股市造好，港股連升兩日，再升203點，已經收復農曆年後失地三分之二。
早前跌得最勁的內銀、內險股成為反彈最勁的股份，低撈者富貴險中求，呢一彈算係得咗
，有得食要趁手。睇個市連彈兩日已有少少要回氣的味道，內地大升3.3%，港股升得1.1%，而且內地未收市港股兩點幾已經回回地，唔係話港股唔會再升，如美股內地股抽高港股都會跟下，但自身反彈動力已消耗咗不少。
插得急 彈得勁
最新公佈數據，內地上月新增人民幣貸款2.51萬億元，創單月紀錄新高，相信係阿爺放水兼催谷放款的結果，加上人行又新推300億元人民幣逆回購，中港股市昨早應聲抽高。恒生指數半日飆逾三百點，與內地相關股份，特別係金融同地產最靚仔。
其後外電引述消息指出，國務院正在考慮降低銀行壞帳撥備覆蓋率，但尚未確定具體細節，但減壞帳撥備率即係等佢哋多啲錢借出去收息，阿爺力托內銀的動機好明顯，外資唱到內銀就嚟執咁款，阿爺點都要做少少嘢，咁做亦增加市場的流動性。
在內地股市扯高影響下，恒指收報19122點，升203點；國企指數升得多啲，收報8028點，漲164點，成交金額716億元。金融股表現靚仔，中國平安(2318) 飆升3.4%，收報33.65元；A股造好，上證升3.8﹪，安碩A50(2823) 升3.8%，收報9.14元；建行(939) 收漲2%，報4.62元。
猴年股市急插，跟住連彈，呢啲咁急嘅股市，睇到人驚心動魄之餘，一班中環茶友，其中一個有銀之人問，若果膽粗粗想追入撈貨，家撈乜股好？有個茶友俾意見前就問，你買股係想長線抑或短線先？因為兩者好唔同，如果你係長線，咁自然買啲業務穩定，回報較高，派息唔會好波動的股份啦，但呢類股份好處係人都睇到，股份係大跌市都唔會急插，跌得少自然彈得慢，故此就算撈到貨，短期都唔會有着數。要留意係家個市唔似穩定番晒、進入上升周期，所以如果唔係大把銀，買呢類股票可能早咗小小喎。
佢話至於有大把銀在手，諗住攞少少出來玩吓走短線，咁目標就係對市況敏感的股票，即係炒家講高beta嘅股票，好似呢排大幅波動的銀行股、金融股。這類股票跌得急，彈得快，但撈貨就真係好考功夫，通常只能在連續大插幾日時冒險出手接刀，而唔係家升兩日彈咗咁多去撈，呢類股票由低位回升唔少，已經可以轉身走，估計又有批高手會出貨食胡，家入市隨時接貨，所以短炒呢類股票，最好係個市大插時出手。
呢大半年個市反覆下插，帶來幾次呢類入貨機會，未來仍然有機，除非美國話轉軚去量寬，否則仲有下插的機會。
比高發市當三年
茶友話，家個市仲係政府同大戶鬥緊法。數據顯示，今年沽空港股的大戶空倉沒有減少，佢哋主要沽空同內地及金融相關股票，最近淡倉開始包括埋科網股好似騰訊(700) ，唔排除係因為美國納斯達克指數轉弱，大戶開始睇淡科網股前景，加上呢類股票估值同其他傳統股份拉大，令到沽空的值博率增加，唔排除科網股波動性都會增強，若然個時大跌，有可能會急插，到時先至博反彈都未遲。
最後，講兩句周星馳執導兼監製的猴年賀歲片《美人魚》，在內地上映八日票房已衝破20億元人民幣，有機會取代去年的《捉妖記》，成為中國電影史票房第一位。係好消息帶動下，出品公司兼由星爺做大股東的比高(8220) 股價繼續升。
睇番佢去年升過去0.425元，比昨日收市價高三成。雖然佢市值不足10億元，加上電影概念股當炒，但星爺製作一向嚴謹，幾年至出一部作品，蘇州過後有排等，所以家可能係睇位落車多過上車嘅時候！
陸羽仁
金融High Tea 舊文
來源 source: http://hdfin.stheadline.com
