中環在線：
手機銷售放緩 轉攻智能家電
小米雷軍sell電飯煲
■雷軍指，佢托住呢款飯煲只賣999元人仔。 
過去智能手機大賣，小米創辦人雷軍每個細節都向蘋果「致敬」，小米手機嘅功能形狀都時時刻刻同蘋果iPhone做比較；佢上台
講解新手機時，無論衣著同表達方式都有「蘋果教主」喬布斯嘅影子，到近期喺各地設立「小米之家」，內部設計都同蘋果Apple Store有幾分相似，難怪大家都稱呼佢為「雷布斯」。
聲稱媲美日本電飯煲
雷軍曾經講過要搵「風口」，「只要站在風口，豬都能飛起來」，不過最近手機銷售情況似乎就麻麻哋，連佢一直致敬嘅蘋果，最近都要推出低價版iPhone SE，或者反映曾經係風口位嘅智能手機行業，已經冇乜風。
不過，雷軍既然曾經搵到智能手機呢個大風口，令到小米出曬名，當然會早著先機再搵另一個風口，畀自己繼續起飛。
佢最近就覺得，智能家居將會成為新希望，噚日不惜化身做「蘇寧男」，托住部小米有份投資嘅「米家壓力IH電飯煲」hard sell，不斷講佢煮出嚟嘅飯可以拍得住日本賣過萬蚊嘅貴價電飯煲，又可以同手機聯繫，因應需要對烹調方式進行微調，而且佢部電飯煲只係賣999元人仔。
不過，雷軍賣電飯煲只係齋講，冇煮畀人試食，似乎說服力就差咗少少喇。其實佢下次不妨考慮做廚師，甚至係「肥媽」上身，即場用部電飯煲煮飯畀參與者試食，就算唔夠時間，亦可以出動金句：「由於時間關係，呢碟餸已經準備好。」只要試過係食得嘅，自然有人買，雷布斯又可以搵到佢嘅新風口嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
