收市閒情：
李小加慈悲過唐三藏
■香港交易所行政總裁李小加好似唐三藏咁慈悲為懷。 路透社
作為散戶，有時真係覺得李小加，好似唐三藏咁慈悲為懷！情況就好似悟空同唐三藏講：「師父，呢度有妖氣！」點知唐三藏唔單止不加防範，反而鬧悟空，「萬物皆有靈，何苦趕盡殺絕？」
港交所（388）近年「
妖氣沖天」，一隻二隻蜘蛛精、白骨精打橫行，一隻毅信（1246）合股再供股，仲要賤格到「2供11」，埋單供股成本條數好難計。
近年港股變成殼股交易所是常識吧，啤殼潮啤出一隻隻老千股，近期李小加出席分析員會議，就因為「老千股」俾人質。你同李小加講，「小加，呢度有好強嘅妖氣，我哋唔好俾佢哋入屋。」佢就唐三藏上身，「悟空！佢哋好多都唔係妖股，我佛慈悲，全部放曬佢哋入嚟！」
2015年殼股炒到癲，112間公司申請上市，得3間係港交所要求更多資料而延批，至於被拒上市嘅公司更加係「零」；睇埋2014年，同樣係「零」。比起2011年同2013年，有3間公司被拒上市，2012年上市申請只有63間，但港交所拒5間於門外。小加，難道近兩年港股老千全部金盤洗手，變得又pure又true，隻隻乾淨上得市？定係你哋唔做嘢？
懶理妖股充斥市場
港股唐三藏放曬啲牛鬼蛇神入屋，結果係點？今年有16隻新股上市，其中5隻配股上，其中4隻第一日就以倍計爆升（噚日正利（8318）就高圍飛價7倍！）有幾隻莊家食完就打回原形。另外IPO上市嘅，年年卡（3773）同融眾（3963）早已跌穿招股價，融眾更潛水近四成。兩隻股現在市值得幾億元，發生咩事？你懂的。
妖精現形，你走去怪三藏小加，但佢竟同你講，「悟空，萬物性本善，上市後公司變壞，就唔係上市科的責任。再者，我哋放佢哋入屋時，係完全符合上市標準！」真係要拎塊照妖鏡出嚟！
創徽國際（8335）原本係配股上市，上星期四掛牌，點知上市前兩日，港交所收到投訴所以要延遲上市。至於係咩投訴，打去港交所問，佢話要保密唔講得。話唔上就唔上？然後不了了之？收到風，話創徽原本book咗JW萬豪豪搞上市慶功宴，點知創徽前CFO向港交所告密，上市大計Hold住咗。咁係咪反映，如果唔係有人告密，港交所都唔知條數有問題？你仲同我講，港交所有做好把關工作？
最可愛係，如果你炒老千股出事，小加會同你講，「不要碰他，你就不會受傷。」情況好似，你放曬啲殺人犯出獄，然後再有人遇害，你同佢講，「你唔出街，咪冇事囉。」另，小加話，反正都阻唔到老千股，不如開個門檻更低嘅「第三板」。
一個人為搵錢，原來真係連基本邏輯都會失去。施主，回頭是岸呀！
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
