內銀派息定高下
2016年03月30日
放假前，跨國銀行股喺外圍由渣打領跌，市場估計港股開市凶多吉少，結果復活節後重開，港股只係輕微腳軟，表現比想像中好，但係唔係真係咁呢，相信要睇期指結算同三月份季結後至知。
銀行股表現可以話係三月尾、四月頭港股重頭戲。原先戲碼係內銀股公佈業績，
有部份大行已經暗唱佢哋會唔會減少派息。市場流傳話內地要求銀行保留多啲盈利，以應付呆壞帳增加，因此有睇法話內銀會減少派息，令本來撐住股價嘅重要利好因素受衝擊。正當投資者眼光集中喺內銀成績表，突然渣打股價喺外圍碌低，最低插成8%。
減唔減息至關實際
渣打忽然間被插，主要係上星期有澳洲銀行宣佈業績，受礦業及其他商品資源價格下跌影響，壞帳撥備將較原先預期為高，市場於是聯想到有唔少礦業貸款嘅渣打，壞帳風險可能增加，立即推低佢喺英國股價，連匯控股價都有壓力。返到香港，渣打收報49.6元，跌2元或3.9%；匯控(005) 跌0.41%，造48.6元，跌幅已經相對溫和。
雖然渣打喺香港跌幅細過倫敦，但大行就驚佢唔死，衝前踩多腳。摩根士丹利發表報告，預期未來60日渣打(2888) 股價下跌機會大，因市場對該股的收入睇法過於樂觀，料會向下修訂盈利預測，仲話渣打股價下跌機會高達60至70%，給予「減持」評級，目標價僅睇400便士，折合44.1港元。渣打昨收報439.4便士，折合約48.6港元。至於內銀股嘅業績，市場一般唔會對增長寄予厚望，最實際反而係派息政策會點。有人估佢哋會減少派息，以維持資本率，過去內銀力撐派息，如果有資本需求，寧願之後再發新股籌集資金。由於內銀股係國有銀行，過去佢哋撥備同派息政策會大同小異。不過，早前內媒就引述知情人士指，在差異化監管思路下，中銀監將調整撥備覆蓋率的最低監管要求，辦法正在研究中，可能有7間上市銀行的撥備覆蓋率將降至130%至140%不等。
季結在即大戶續頂
五家國有大行均可能下調撥備，股份制銀行中，招商銀行和興業銀行或將獲此資格。農業銀行(1288) 、建設銀行(939) 、中國銀行(3988) 的撥備覆蓋率或下調至130%，工商銀行(1398) 、交通銀行(3328) 、招商銀行(3968) 、興業銀行的撥備覆蓋率或下調至140%。可能因為憧憬中銀監會鬆手少少，加上昨日交行公佈賺逾600億元，升1%，派末期息27仙，較市場預期好，緩和對減低派息比率的憂慮，另外集團貸款減值損失為271.6億元，按年增加增幅32.88%。內銀股昨日表現相對算穩定。交行收報4.87，跌0.6%，建行收報4.9元，升0.8%、工行報4.25元，升0.47%。今日掛牌的內銀浙商銀行(2016) ，上市前夕其暗盤初段走低，較招股價3.96元低2.5%。
由於市場觀望內銀股業績同派息及期指結算，同時美國聯儲局主席耶倫亦會發表言論，港股都幾悶吓，內地股市向下，港股曾失守20300點，大市午後回穩，最終微升收市。恒指收報20366點，升20點；國指收報8726點，上揚25點，成交金額600億元。中國建材(3323) 去年純利大瀉82.8%，股價應聲下挫5.62%收造3.53元，為包尾國企指數成份股。由於季結在即，相信期指大戶點都會頂埋結算後。
今日放榜的永利澳門(1128) ，主席史提芬•永利(Stephen Wynn)遭其前妻伊萊恩•永利入稟法院爭取兩人共同持有的永利澳門母公司永利的控制權。
陸羽仁
金融High Tea 舊文
來源 source: http://hdfin.stheadline.com
